ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވަޢުދުފުޅާ އެއްގޮތަށް، މާލެ ސަރަހައްދުގެ ޖާގަ ތަނަވަސް މިސްކިތްތައް ފިނިކުރުމުގެ މަޝްރޫޢުގެ ދަށުން، ގްރޭޓަރ މާލޭ ސަރަހައްދުގެ މިސްކިތްތައް އޭސީ ކުރުމުގެ ޢަމަލީ މަސައްކަތް ސްޓެލްކޯއިން ރަސްމީކޮށް ފަށައިފިއެވެ.
މި މަސައްކަތަކީ 800 މީހުންނަށްވުރެ ގިނަ މީހުންނަށް އެއްފަހަރާ ނަމާދު ކުރެވޭ ޖާގައިގެ ހުރިހާ މިސްކިތެއް އެއާކޮންޑިޝަން ކުރުމަށް ސަރުކާރުން ކަނޑައަޅުއްވާފައިވާ ސިޔާސަތުގެ ދަށުން ކުރިއަށް ގެންދާ މުހިންމު މަސައްކަތެކެވެ. މިނިސްޓްރީ އޮފް އިސްލާމިކް އެފެއާޒްއާ ގުޅިގެން ސްޓެލްކޯއިން ކުރިއަށް ގެންދާ މި މަޝްރޫޢުގެ މަސައްކަތްތައް ކުރިއަށްދާ ގޮތް، ސްޓެލްކޯ ހިންގެވުމާ ހަވާލުވެވަޑައިގެން ހުންނެވި ޑެޕިއުޓީ މެނޭޖިންގ ޑިރެކްޓަރ ޑރ. ޢަލީ އަޒްވަރާއި ކުންފުނީގެ އިސްވެރިން މިއަދު ވަނީ ބައްލަވާލައްވާފައެވެ.
މިސްކިތްތައް ފިނިކުރުމުގެ މަސައްކަތުގެ އިތުރުން، ސްޓެލްކޯގެ އިސްވެރިން މިއަދު ވަނީ ހުޅުމާލެއަށް ވަޑައިގެން، ކަރަންޓުގެ ޚިދުމަތް ހަރުދަނާ ކުރުމަށް ކުރަމުންދާ މަސައްކަތްތައްވެސް ބައްލަވާލައްވާފައެވެ. ޚާއްޞަކޮށް މިއަހަރުގެ ހޫނު މޫސުމާ ދިމާކޮށް ކަރަންޓު ބޭނުންކުރާ މިންވަރު އިތުރުވެގެންދާނެތީ، އެކަމަށް ތައްޔާރުވުމުގެ ގޮތުން “ޕީކް ހޭންޑްލިންގ” އަށް ވާންޖެހޭ ތައްޔާރީތައް އެ ކުންފުނިން އަންނަނީ ވަމުންނެވެ.
މިގޮތުން މާލެ ސަރަހައްދުގެ ކަރަންޓުގެ ކެޕޭސިޓީ އިތުރުކުރުމަށްޓަކައި، 2 އެމްވީއޭގެ 15 ޖެންސެޓު ބެހެއްޓުމުގެ މަސައްކަތް ބާރަށް ކުރިއަށްދާކަން ސްޓެލްކޯއިން ވަނީ ހާމަކޮށްފައެވެ. މި މަސައްކަތްތަކުގެ މަޤްޞަދަކީ ޑިމާންޑް ބޮޑުވާ ވަގުތުތަކުގައިވެސް ރައްޔިތުންނަށް ދަތިކަމަކާ ނުލައި ކަރަންޓުގެ ޚިދުމަތް ފޯރުކޮށްދިނުން ކަމުގައި އެ ކުންފުނިން ބުނެއެވެ.