ދިހަ ކިލޯ އަށް ވުރެ ބަރު ކަންނެލި މިފްކޯގެ ސެންޓަރުތަކުންނާއި ބޯޓުތަކުން ގަންނަން ފަށައިފިއެވެ.
ސަރުކާރުގެ މަސް ކުންފުންޏަށް ކަންނެލި ގަތުމަށް ވާންޖެހޭ އެންމެހާ ތައްޔާރީތައް ނިންމައި، ކަނޑުއޮތްގިރި އޮޕަރޭޝަނަށް ގެނެސް ރަސްމީކޮށް ކަންނެލި ގަންނަން ފެށީ މި މަހުގެ 11 ގަ އެވެ. އެ ދުވަހުން ފެށިގެން މިހާތަނަށް ގަންނަމުން އައީ 15 ކިލޯއިން މަތީގެ ކަންނެއްޔެވެ.
ނަމަވެސް މިފްކޯއިން ބުނީ މިހާރު އެ ކުންފުނީގެ ސެންޓަރުތަކުންނާއި ބޯޓުތަކުން 10 ކިލޯ އާއި އެއަށް ވުރެ ބަރު ކަންނެލި ވެސް ގަންނަމުން އަންނަ ކަމަށެވެ. އެގޮތުން 10 ކިލޯގެ ކަންނެލި ގަންނަނީ ކިލޯއެއް 20ރ. ރޭޓުންްނެވެ. އަދި 15 ކިލޯއިން މަތީގެ ކަންނެލި ގަންނަމުން އަންނަނީ ކިލޯއެއް 25ރ. ގެ ރޭޓުންނެވެ.
މިކަމާ ގުޅިގެން ބޮޑު ކަންނެލި މަސްވެރިންގެ ޔުނިއަން އިން އެކަން ފާހަގަކޮށް މި ކުރިއެރުމަށް މަސައްކަތްކޮށް ދިން ފަރާތްތަކަށް މިއަދު ޝުކުރު ވެސް އަދާކޮށްފައިވެ އެވެ.
މިފްކޯ އިން ބުނީ ކަޅުބިލަމަހެކޭ އެއްފަދައިން މިފްކޯއަށް ކިރުވާ ކަންނެލި މަހަށް 48 ގަޑިއިރުތެރޭ ފައިސާ ދޫކުރަމުން އަންނަ ކަމަށެވެ.