އެޕްރީލް މަހު ބާއްވާ ލޯކަލް ކައުންސިލްތަކުގެ އިންތިހާބާއި އަންހެނުންގެ ތަރައްގީއަށް މަސައްކަތްކުރާ ކޮމިޓީގެ އިންތިހާބުގެ ވޯޓު ދިނުމުގެ ހައްގު ލިބިފައިވާ މީހުންގެ ރަޖިސްޓަރީއަށް ޝަކުވާ ހުށައަޅަން ދިން މުއްދަތު މިއަދަށް ހަމަވިއިރު 700 ވުރެ ގިނަ ޝަކުވާއެއް ލިބިފައިވާ ކަމަށް އިލެކްޝަންސް ކޮމިޝަން (އީސީ) އިން ބުނެފި އެވެ.
އީސީން ބުނީ ވޯޓު ދިނުމުގެ ޙައްޤު ލިބިފައިވާ މީހުންގެ ރަޖިސްޓަރީއަށް ޝަކުވާ ހުށައެޅުމަށް ދިން މުއްދަތު މިއަދު މެންދުރު ފަހު 3:00 އަށް ހަމަވިއިރު 779 ޝަކުވާ ލިބިފައިވާ ކަމަށެވެ. އޭގެ ތެރޭގައި ހިމެނެނީ އެޑްރެސް ބަދަލުވެފައިވެގެންނާއި ރަށްވެހިކަން ބަދަލުވުމުގެ އިތުރަށް ނިޔާވެފައިވާތީ، ރަޖިސްޓަރީން ނަން އުނިކުރުމަށް އެދި ހުށަހެޅި ޝަކުވާތަކެވެ.
ކައުންސިލްތަކުގެ އިންތިހާބާއި އަންހެނުންގެ ތަރައްގީ އަށް މަސައްކަތްކުރާ ކޮމިޓީގެ އިންތިހާބުގައި ވޯޓު ދިނުމުގެ ހައްގު ޖުމްލަ 294،937 މީހުންނަށް ލިބެ އެވެ. އޭގެތެރޭގައި ހިމެނެނީ 144،527 އަންހެނުންނާއި 150،410 ފިރިހެނުންނެވެ.
އިންތިހާބު އޮންނާނީ އޭޕްރީލް 4 ގަ އެވެ.