ދިރާގު ދިވެހި ޕްރިމިއާ ލީގުގައި މިރޭ ކުޅުނު މެޗުގައި ޔުނައިޓެޑް ވިކްޓަރީ (ޔޫވީ) އަތުން ނިއު ރޭޑިއަންޓް ސްޕޯޓްސް ކްލަބުން 2-0 އިން މޮޅުވެ، އަލުން ލީގުގެ ތިން ވަނަ އަށް ޖެހިލައިފިއެވެ.
ގަލޮޅު ދަނޑުގައި ރޭ ކުޅުނު މެޗުގައި ނިއު އިން ވަނީ ފުރަތަމަ ހާފުގައި ލީޑުނަގައިފައެވެ. އެ ގޮތުން، އެ ޓީމަށް މި ލަނޑު ޖަހާފައިވަނީ ފަހަތަށް ކުޅެމުން އަންނަ ޑިފެންޑަރު، މުހައްމަދު ނިޒާމް (ޕީކޭ) އެވެ.
ނިއު އިން ދެ ވަނަ ލަނޑު ޖެހީ ދެ ވަނަ ހާފުގަ އެވެ. މި ލަނޑު ކާމިޔާބުކުރީ މެޗުގެ 65 ވަނަ މިނިޓްގައި އެ ޓީމުގެ ނައިޖީރިއާ ފޯވާޑް، އަލްހާޖީ ގޭރޯ އެވެ. ނިއުގެ ބްރެޒިލް މިޑްފީލްޑަރު، ގޯމޭސް ޑަ ސިލްވާ ނަގައިދިން ބޯޅައަކަށް އަރައި ގޭރޯ މި ލަނޑު ޖެހީ ބޮލުން ގޯލުގެ ތެރެއަށް ބޯޅަ ފޮނުވާލައިގެންނެވެ.
ނިއު އިން މި މެޗުގައި ވެސް އަލީ އަޝްފާގު (ދަގަނޑޭ) ވަނީ ދެ ވަނަ ހާފުގައި ކުޅެން ނެރެފައެވެ.
މި މެޗަށް ނުކުތްއިރު، ހަތަރެއްގައި އޮތް ނިއު މި މެޗުން ހޯދި 3 ޕޮއިންޓާއިއެކު ތިން ވަނައިގައިގައި އޮތީ 15 މެޗުން 30 ޕޮއިންޓް ހޯދައިގެންނެވެ. ބުރު ސްޕޯޓްސް ކްލަބުން ހަތަރެއްގައި އޮތީ 15 މެޗުން 27 ޕޮއިންޓާ އެކުއެވެ. ލީގުގެ އެންމެ ފުލުގައި އޮތް ޔުނައިޓެޑް ވިކްޓަރީ އަށް 15 މެޗުން ލިބިފައިވަނީ ހަތް ޕޮއިންޓެވެ.