އިނގިރޭސި ޕްރިމިއާ ލީގުގައި އާސެނަލް އާއި ލިވަޕޫލް ވާދަކުރި މެޗު އެއްވަރު ވެގެން ނިމިއްޖެއެވެ.
އާސެނަލްގެ އެމިރޭޓްސް ސްޓޭޑިއަމްގައި ކުޅުނު މި މެޗު ނިމިގެން ދިޔައީ ދެ ޓީމުންކުރެ އެއްވެސް ޓީމަކަށް ލަނޑެއް ނުޖެހި އެއްވަރު ވެގެންނެވެ.
ދެ ޓީމުގެ ފަރާތުންވެސް ވާދަވެރި ކުޅުމެއް ފެނިގެން ދިޔަ މި މެޗު ފަށައިގެން ދެ ޓީމުންވެސް ގިނަ ހަމަލާތަކެއް އުފައްދަން މަސައްކަތް ކޮށްފައިވެއެވެ. މިގޮތުން ލިވަޕޫލްގެ ކޮނޯ ބްރެޑްލީ ފޮނުވާލި ހަމަލާއެއް އަމާޒުވެފައިވަނީ ގޯލުގެ މަތީ ދަނޑިއަށެވެ.
މީގެ އިތުރުން އާސެނަލުން ވެސް ވަނީ ލަނޑު ޖަހާނެ ރަނގަޅު ފުރުސަތުތަކެއް މެޗުގެ ފުރަތަމަ ހާފުގައި ހޯދައިފައެވެ.
މެޗުގެ ދެވަނަ ހާފުގައި އާސެނަލްގެ ފަރާތުން މާ ގިނަ ހަމަލާތަކެއް ފެނިގެން ގޮސްފައިނުވާއިރު، ލިވަޕޫލުން ވަނީ މެޗުގެ ދެވަނަ ހާފުގައި މޮޅު ކުޅުމެއް ދައްކާފައެވެ.
ލިވަޕޫލުން މި ހާފުގައި ކުޅުން ރަނގަޅުކޮށް ގިނަ ހަމަލާތަކެއް އުފައްދަން މަސައްކަތް ކުރި ނަމަވެސް މި ހާފުގައިވެސް ލަނޑެއް ޖެހޭ ގޮތެއް ނުވިއެވެ.
މި ނަތީޖާ އާއެކު 49 ޕޮއިންޓާއެކު ތާވަލްގެ އެއްވަނައިގައި އާސެނަލް އޮތްއިރު، ކުޅުނު 21 މެޗުން ހޯދި 35 ޕޮއިންޓާއެކު ލިވަޕޫލް މިވަގުތު އޮތީ ޓޭބަލްގެ ހަތަރު ވަނައިގައެވެ.