ކުރިއަށް އޮތް ކައުންސިލް އިންތިހާބުގައި ހަނިމާދޫ ދާއިރާގެ ރައީސްގެ މަގާމަށް އެމްޑީޕީ ޓިކެޓް ލިބިފައި އޮތް ކައުންސިލްގެ ރައީސް އަބްދުއްސައްތާރު ހަސަންގެ ޓިކެޓް އަތުލައިފިއެވެ.
އަބްދުއްސައްތާރުގެ ޓިކެޓް އަތުލީ އެމްޑީޕީގެ ވަގުތީ ޗެއާޕާސަން އަބްދުލްޣަފޫރު މޫސާގެ ނުފޫޒުން ކަމަށް އިތުބާރުހުރި މަސްދަރަކުން ވަނީ ކަށަވަރުވެފައެވެ.
އޭނާގެ ޓިކެޓް އަތުލި ސަބަބެއް ކަމަށް އެ ޕާޓީން ބުނީ ޕީޖީ އޮފީހުގައި ރެކޯޑެއް އޮތުމެވެ.
މިކަމާ ގުޅިގެން އަބްދުއްސައްތާރު ވަނީ އެ މައްސަލަ އެމްޑީޕީގެ ޝަކުވާ ބަލާ ކޮމިޓީއަށް ހުށަހަޅާފައެވެ.
މިކަމާ ގުޅިގެން އެމްޑީޕީން އެންމެ ފަހުން ބޭއްވި ނޫސްވެރިންގެ ބައްދަލުވުމުގައި ސުވާލުކުރުމުން އެ ޕާޓީގެ ތަރުޖަމާނު ވިދާޅުވީ އެފަދަ ނިންމުންތައް ނިންމާނީ ދާއިރާތަކުގެ މަސްލަހަތާއި ޕާޓީގެ މަސްލަހަތަށް އިސްކަންދީގެން ކަމަށެވެ.
”ދާއިރާތަކުގެ މަސްލަހަތާއި ޕާޓީގެ މަސްލަހަތަށް އިސްކަން ދީގެން ޕާޓީއަށް އަދި ދާއިރާއަށް/ރަށަށް އެންމެ ފައިދާ“ ހުރި ގޮތެއްގެ މަތިން ކެންޑިޑޭޓުން ކަނޑައެޅުމުގެ މުހިންމު ކަމުގެ މައްޗަށް ބުރަވެ ބައެއް ދާއިރާތަކުގައި ތަފާތު އެކި މައްސަލަ ދިމާވުމުން، އެ މައްސަލައެއް ހައްލުކުރުމުގައި ކޮމިޓީން ބަލަނީ އެ ރަށެއްގެ އަދި ޕާޓީގެ މަސްލަހަތާއި އިންތިހާބު ކާމިޔާބު ކުރުމުގެ ފުރުސަތު އެންމެ ބޮޑު ގޮތަކަށް“ އަނަސް ވިދާޅުވިއެވެ.