ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް)ގެ އޯޑިނަރީ ކޮންގްރެސް، މިއަހަރުގެ މާޗު މަހުގެ ތެރޭގައި ބާއްވަން ނިންމައިފި އެވެ.
އެފްއޭއެމްގެ ހިންގާ ކޮމެޓީ އިން ހޯމަ ދުވަހު ބޭއްވި ބައްދަލުވުމުގައި ނިންމާފައި ވަނީ، މިއަހަރުގެ މާޗު މަހުގެ ހަތް ވަނަ ދުވަހުގެ ރޭ އޯޑިނަރީ ކޮންގްރެސް ބޭއްވުމަށެވެ. އެގޮތުން އެ ކޮންގްރެސް ބޭއްވުމަށް ހަމަޖެހިފައި ވަނީ ހެންވޭރު މީރުމާގައެވެ.
މިއީ އެފްއޭއެމްގެ ރައީސް ކަމުގެ މަޤާމަށް އަޙުމަދު ޠާރިޤު (ޓޮމް) އިންތިޚާބު ކުރި ފަހުން ބާއްވާ ފުރަތަމަ ކޮންގްރެސްއެވެ. އެންމެ ފަހުން އެފްއޭއެމް އިން ބާއްވާފައި ވަނީ އެކްސްޓްރާ އޯޑިނަރީ ކޮންގްރެސް އެކެވެ. އެއީ މިދިޔަ އަހަރުގެ ޖުލައި މަހުގެ 26 ވަނަ ދުވަހު އެވެ. އެފްއޭއެމްގެ ރައީސް ކަމަށް ޓޮމް އާއި، އޭނާގެ ހިންގާ ކޮމެޓީ އިންތިޚާބު ކޮށްފައި ވަނީ އެ ކޮންގްރެސްގައެވެ.
އެފްއޭއެމް އިން ބާއްވާ އޯޑިނަރީ ކޮންގްރެސްގައި އެ އެސޯސިއޭޝަންގެ އަހަރީ ރިޕޯޓު ފާސް ކުރުމާއި، ބަޖެޓު ފާސް ކުރުން އަދި އިދާރީ ގޮތުން ފުރިހަމަ ކުރަން ޖެހޭ ކަންކަން ކުރިއަށް ގެންދިޔުން އޮންނާނެއެވެ.
މިދިޔަ އަހަރުގެ ޖުލައި މަހުގެ ތެރޭގައި އެފްއޭއެމްގެ ރައީސް ކަމުގެ މަޤާމަށް ޓޮމް ވަޑައިގެން، ޓޮމް އާއި އޭނާގެ ޓީމުން އަންނަނީ ފުޓުބޯޅައިގެ ޙާލަތު ރަނގަޅު ކުރުމަށް ގިނަ މަސައްކަތް ތަކެއް ކުރަމުންނެވެ. އެގޮތުން މެދު ކެނޑިފައި އޮތް ރާއްޖޭގެ ލީގު އަލުން ފަށައި، ފުޓުބޯޅައިގެ ޙަރަކާތްތެރިކަން ވަނީ ވަރަށް ބޮޑަށް އިތުރު ކޮށްފައެވެ.
މީގެ އިތުރުން މިދިޔަ އަހަރުގެ ސެޕްޓެމްބަރު މަހުގެ ތެރޭގައި ޓޮމް ވަނީ، ދުނިޔޭގެ ފުޓުބޯޅައިގެ މައި އިދާރާ (ފީފާ)ގެ ރައީސް ޖިއާނީ އިންފަންޓީނޯއާ ވެސް ބައްދަލު ކުރައްވައިފަ އެވެ. އޭގެ ފަހުން އޮކްޓޫބަރު މަހުގެ ތެރޭގައި އިންފަންޓީނޯ ވަނީ ރަސްމީ ދަތުރުފުޅެއްގައި ރާއްޖެ ވަޑައިގެންފައެވެ.
އެފްއޭއެމް އިން އަންނަނީ ފީފާއާ ގުޅިގެން ރާއްޖޭގެ ފުޓުބޯޅަ ކުރިއެރުވުމަށް ގިނަ މަސައްކަތް ތަކެއް ކުރަމުންނެވެ.