ދިރާގު ދިވެހި ޕްރިމިއަރ ލީގުގައި ނިއު ރޭޑިއަންޓް ސްޕޯޓްސް ކުލަބާއި އޮޑި ސްޕޯޓްސް ކްލަބް ބައްދަލުކުރި މެޗު ލަނޑެއް ނުޖެހި އެއްވަރުވުމާއެކު، ލީގު ތަށި ދިފާއުކުރުމުގެ ފުރުސަތު މާޒިޔާ ސްޕޯޓްސް އެންޑް ރެކްރިއޭޝަނުން ވަރަށް ބޮޑަށް ފަހިކޮށްފިއެވެ.
ގަލޮޅު ރަސްމީ ދަނޑުގައި ކުޅުނު މި މެޗު ނިމުނީ 0-0 އިން ދެޓީމު އެއްވަރުވެގެންނެވެ.
މެޗުގެ ފުރަތަމަ ހާފުގައި ދެޓީމުގެ ފަރާތުންވެސް ފެނުނީ ވަރަށް ބަލައިގެން ކުޅުނު ތަނެވެ. އެޓޭކިންގް ގޭމެއް ކުޅެން ދެޓީމުންވެސް މަސައްކަތް ކުރި ނަމަވެސް، ނުރައްކާތެރި ހަމަލާތަކެއް އުފެއްދުމުގައި ދަތިތަކެއް ކުރިމަތިވިއެވެ. ނަމަވެސް ދެވަނަ ހާފުގައިވެސް ދެޓީމުން ލަނޑެއް ޖެހޭތޯ މަސައްކަތް ކުރިއެވެ.
އެގޮތުން ދެވަނަ ހާފުގައި ވެސް ދެޓީމުގެ ފަރާތުން ފޮނުވވާލި ގިނ ހަމަލާތައް ކީޕަރުންވަނީ ހުއްޓުވާފައެވެ.
މި ނަތީޖާއާއެކު ތާވަލުގެ އެއްވަނައިގައި އޮތް މާޒިޔާއަށް ވަނީ 8 ޕޮއިންޓުގެ ބޮޑު ލީޑެއް ލިބިފައެވެ. ލީގުގައި ކޮންމެ ޓީމަކަށް ބާކީ ފަސް މެޗު އޮތްއިރު، މާޒިޔާ އެއްވަނައިގައި އޮތީ ކުޅުނު އެއްވެސް މެޗަކުން ބަލިނުވެ 37 ޕޮއިންޓާއެކުއެވެ. މެޗުން އެއްވަރުވި އޮޑި ސްޕޯޓްސް 29 ޕޮއިންޓާއެކު ދެވަނައިގައި އޮތްއިރު، ނިއު ރޭޑިއަންޓް ތިންވަނައިގައި އޮތީ 24 ޕޮއިންޓާއެކުއެވެ.