ވެނެޒުއޭލާގައި ރައްކާތެރި ވެރިކަމެއް ގާއިމްވަންދެން އެގައުމުގެ ވެރިކަން ބަލަހައްޓާނީ އެމެރިކާއިން ކަމަށް ރައީސް ޑޮނަލްޑް ޓްރަމްޕު ބުނެފިއެވެ.
އެމެރިކާގެ އަސްކަރިއްޔާ ވެނެޒުއޭލާއަށް ވަދެ ރައީސް ނިކޮލަސް މަޑޫރޯއާއި އޭނާގެ އަނބިކަނބަލުން ހައްޔަރުކޮށްފައިވާއިރު، މަޑޫރޯ އެމެރިކާ ސިފައިންގެ ބެލުމުގައި ހުރި ފޮޓޯއެއް ޓްރަމްޕު ވަނީ އާންމުކޮށްފައެވެ.
ވެނެޒުއޭލާގެ ހާލަތާއިބެހޭ ނޫސްވެރިންގެ ބައްދަލުވުމުގައި ވާހަކަދައްކަވަމުން ޓްރަމްޕު ބުނީ ރަނގަޅު ޓްރާންސިޝަނެއް ލިބެންދެން ވެނެޒުއޭލާ ހިންގާނީ އެމެރިކާއިން ކަމަށެވެ. އެގައުމުގެ ވެރިކަން ހިންގުމުގައި އަމަލީގޮތުން ހަރަކާތްތެރިވަނީ ފޮރިން ސެކްރެޓަރީ މާކޯ ރޫބިއޯއާއި ޑިފެންސް ސެކްރެޓަރީ ޕީޓް ހެގްސެތް ކަމުގެ އިޝާރާތެއްވެސް ޓްރަމްޕު ދިނެވެ.
ޓްރަމްޕު ވަނީ މަޑޫރޯ އެމެރިކާއަށް މަސްތުވާތަކެތި ވެއްދުމަށް އެހީތެރިވަމުންދާކަމަށް ތުހުމަތުކޮށްފައެވެ. ނަމަވެސް މަޑޫރޯ ތުހުމަތުކުރަނީ ޓްރަމްޕު އެގައުމުގެ ތެލުގެ ރިޒާވްގެ ކޮންޓްރޯލް ނެގުމަށް މަސައްކަތްކުރާކަމަށެވެ.