ވެލާނާ އިންޓަނޭޝަނަލް އެއާޕޯޓު (ވީއައިއޭ) ގެ އާ ޓާމިނަލުގައި ދިވެހީންނަށް އީ-ގޭޓުގެ ޚިދުމަތް މިއަދު ރަސްމީކޮށް ދޭން ފަށައިފިއެވެ.
މި ޚިދުމަތް ފައްޓަވައި ދެއްވީ ކޮންޓްރޯލާ ޖެނެރަލް އޮފް އިމިގްރޭޝަންސް އަޙްމަދު ފަސީހުއެވެ.
މިކަމަށްޓަކައި އާ ޓާމިނަލްގައި ބޭއްވި ޚާއްސަ ހަފްލާގައި ކޮމިޝަނާ އޮފް ޕޮލިސް އިސްމާއީލް ނަވީނާއި، އެމްއޭސީއެލްގެ ސީއީއޯ އަދި މެނޭޖިން ޑިރެކްޓަރު އިބްރާހީމް ޝަރީފްގެ އިތުރުން ދައުލަތުގެ އިސްވެރިން ބައިވެރިވެވަޑައިގެންނެވި އެވެ. މިއަދުން ފެށިގެން އާ ޓާމިނަލްގެ އެރައިވަލްގައި ބަހައްޓާފައިވާ ފަސް އީ-ގޭޓު އަދި ޑިޕާޗާގައި ބަހައްޓާފައިވާ ފަސް އީ-ގޭޓުން ހިދުމަތް ދޭނެ އެވެ.
އިމިގްރޭޝަނުން ހާމަކުރި ގޮތުގައި މި ވަގުތު މި ޚިދުމަތް ދިވެހީންނަށް އެކަނި ލިބުނު ނަމަވެސް، ކުރިއަށް އޮތްތަނުގައި މި ޚިދުމަތް އިތުރަށް ފުޅާކުރުމަށް ވަނީ ރޭވިފަ އެވެ. އެގޮތުން އެރައިވަލްގައި 10 އީ-ގޭޓު އަދި ޑިޕާޗާގައި 10 އީ-ގޭޓު ބަހައްޓައި، ބިދޭސީންނަށް ވެސް މި ޚިދުމަތް ލިބޭނެ ގޮތް ހަދާނެ އެވެ. މި ބަދަލާއެކު 2026 ވަނަ އަހަރުގެ ފުރަތަމަ ކުއާޓާ ތެރޭގައި އެންމެންނަށް މި ޚިދުމަތް ލިބިގެންދާނެ ކަމަށް އިމިގްރޭޝަނުން ބުނެ އެވެ.
ވީއައިއޭގެ އާ ޓާމިނަލަކީ ޒަމާނީ ފެންވަރަށް ތަރައްގީކޮށް، މިދިޔަ ޖުލައި މަހު ހުޅުވި ޓާމިނަލެކެވެ. މި ޓާމިނަލުގައި ފަސިންޖަރުންނަށް ލުއިފަސޭހަވާނެ އެތައް ޚިދުމަތްތަކެއް ގާއިމްކޮށްފައިވާއިރު، އީ-ގޭޓަކީ އޭގެ ތެރެއިން ފާހަގަކޮށްލެވޭ މުހިންމު ޚިދުމަތެކެވެ.