ކުރީގެ ދިވެހި ފިލްމު ޑައިރެކްޓަރު އަބްދުލް ފައްތާހު ނިޔާވުމާއި ގުޅިގެން އޭނާގެ އާއިލާއަށް ރައީސް ޑރ. މުހައްމަދު މުއިއްޒު ތައުޒިޔާ ދަންނަވައިފިއެވެ.
ފައްތާހް ނިޔާވީ އޭނާގެ އުފަން ރަށް ހއ. ކެލާގައި ހުއްޓައި ހާޓް އެޓޭކެއް ޖެހިގެން ދިއްދޫ ހޮސްޕިޓަލަށް ގެންގޮސް ފަރުވާ ދެމުން ދަނިކޮށެވެ. ފައްތާހަށް އެންމެ ފުރަތަމަ ފަރުވާ ދިނީ ކެލާ ސިއްހީ މަރުކަޒުގައެވެ. އެކަމަކު، އިތުރު ފަރުވާ އަށް އޭނާ ގެންދަން ޖެހުނީ ދިއްދޫ ހޮސްޕިޓަލަށެވެ.
ރައީސް މީސް މީޑިއާގައި ކުރި ޕޯސްޓެއްގައި ވިދާޅުވީ، މުނިފޫހިފިލުވުމުގެ ދާއިރާއިން، ފިލްމު ޑައިރެކްޓް ކުރެއްވުމުގެ ރޮނގުން ގައުމީ ހިދުމަތުގެ އިނާމު ހާސިލްކުރައްވާފައިވާ ފަންނުވެރިއެއްކަމުގައިވާ ފައްތާހް ނިޔާވުމުގެ ހިތާމައިގައި އެ އާއިލާއަށް ތައުޒިޔާ ދަންނަވާ ކަމަށެވެ.
ފައްތާހަކީ ރާއްޖޭގައި އުފެދުނު އެންމެ މޮޅު ޑައިރެކްޓަރުންގެ ތެރެއިން އެކެކެވެ. އޭނާ އުފެއްދި އެތައް ފިލްމެއް ވަނީ މަޝްހޫރު ވެގެން ގޮސްފައެވެ. ފައްތާހްގެ އަގު ވަޒަންކުރުމުގެ ގޮތުން 2004 ވަނަ އަހަރު އޭނާއަށް ވަނީ ގައުމީ އިނާމު ވެސް އަރުވައިފައެވެ.
ފައްތާހުގެ އެންމެ ފަހުގެ ފިލްމަކީ ”ހައްދު“އެވެ. އެ ފިލްމުން ލިބުނު ކާމިޔާބީއަށް ފަހު އޭނާ ވަނީ ފިލްމީ ދާއިރާ އިން ރިޓަޔާކޮށް، ދިރިއުޅުން އުފަން ރަށް ކެލައަށް ބަދަލުކޮށްފައެވެ. އޭނާގެ މަޝްހޫރު ފިލްމުތަކުގެ ތެރޭގައި ”ހިމޭން ދުނިޔެ“، ”ވެހޭ ވާރޭ ތެރެއިން“، ”ވާ ލޯބި އެނގޭ ނަމަ“، ”އުދަބާނީ“ ފަދަ ފިލްމުތައް ހިމެނެއެވެ. އޭނާ އުފެއްދި ކުރު ފިލްމު ”ދޯޕައްޓާ“، ”ތިއޭ މިހިތުގެ ވިންދަކީ“ އަދި ”ހިނިތުންވެލާށޭ ކަލާ“އަކީ ވެސް އާންމުންނަށް ވަރަށް މަގުބޫލުވި ފިލްމުތަކެކެވެ.