މިސީޒަނުގެ ސައުދީ ޕްރޯ ލީގުގައި ކުޅުނު ހުރިހާ މެޗަކުން މޮޅުވެ އަލް ނަސްރުން ދަމަހައްޓަމުންއައި މޮޅުވުމުގެ ރެކޯޑް 10 މެޗަށްފަހު އަލް އިއްތިފާގުން ނިމުމަކަށް ގެންސްފިއެވެ.
ދަމްމާމްގެ ޢަބްދުالله އަލް ދާބީލް ސްޓޭޑިއަމްގައި ރޭ ކުޅުނު މިމެޗު ނިމިފައިވަނީ 2-2 ގެ ނަތީޖާއަކުން ދެޓީމު އެއްވަރުވެގެންނެވެ. މުޅި މެޗުގައި ވެސް މޮޅަށް ކުޅެ އަލް ނަސްރުން މެޗު ޑޮމިނޭޓްކުރި ނަމަވެސް މިމެޗުގައި ފުރަތަމަ ލަނޑުޖަހައި ކުރިހޯދީ އަލް އިއްތިފާގުންނެވެ.
މިލަނޑު ފުރަތަމަ ހާފުގެ 16 ވަނަ މިނެޓުގައި ކާމިޔާބުކޮށްދިނީ އެޓީމުގެ ނެދަލޭންޑްސް މިޑްފީލްޑަރު ޖޯޖީނިއޯ ވައިނާލްޑަމް އެވެ. އަލް ނަސްރުން ނަތީޖާ އެއްވަރުކުރި ލަނޑު ދެވަނަ ހާފު ފެށިގެން ދެވަނަ މިނެޓުގައި ކާމިޔާބުކޮށްދިނީ އެޓީމުގެ ޕޯޗުގަލް ފޯވާޑް ޖޮއާއު ފެލިކްސްއެވެ.
އަލް ނަސްރުން މެޗުގެ ލީޑުހޯދި ލަނޑު ދެވަނަ ހާފުގެ 67 ވަނަ މިނެޓުގައި ކެޕްޓަން ކްރިސްޓިއާނޯ ރޮނާލްޑޯ ކާމިޔާބުކުރިއިރު، ދެވަނަ ހާފުގެ 80 ވަނަ މިނެޓުގައި އަލް އިއްތިފާގަށް މެޗުގެ ނަތީޖާ އެއްވަރުކޮށްދިނީ އެޓީމުގެ ފުރަތަމަ ލަނޑު ވެސް ކާމިޔާބުކޮށްދިން ވައިނަލްޑަމްއެވެ.
މިނަތީޖާއެކު ލީގުގައި ކުޅުނު 11 މެޗުން އަލް ނަސްރަށް 31 ޕޮއިންޓް ލިބިފައިވާއިރު، އެޓީމު މިވަގުތު އޮތީ ތިން ޕޮއިންޓްގެ ލީޑަކާއެކު ތާވަލުގެ އެއްވަނައިގައެވެ. އަދި މިމެޗުން ލިބުނު އެއްޕޮއިންޓާއެކު ލީގުގައި ކުޅުނު 11 މެޗުން އަލް އިއްތިފާގަށް 16 ޕޮއިންޓް ލިބިފައިވާއިރު އެޓީމު މިވަގުތު އޮތީ ތާވަލުގެ އަށްވަނައިގައެވެ.