މެލޭޝިއާގެ ކުރީގެ ބޮޑުވަޒީރު ނަޖީބް ރަޒާކްގެ މައްޗަށް، ބާރުގެ ބޭނުން ނަހަމަގޮތުގައި ބޭނުންކުރި ކަމަށާއި ބިލިއަނުން ޑޮލަރުގެ ހިޔާނާތުގެ މައްސަލާގައި ދެވަނަ ފަހަރަށް ކުށް ސާބިތުވެއްޖެއެވެ.
މި ނިންމުން ކުއަލަލަމްޕޫރު ހައިކޯޓުން ނިންމާފައިވަނީ އިއްޔެއެވެ. އުމުރުން 72 އަހަރުގެ ނަޖީބުގެ މައްޗަށް ސޮވަރިން ވެލްތު ފަންޑުން އޭނާގެ އެކައުންޓުތަކަށް 2.2 ބިލިއަން މެލޭޝިއަން ރިންގިޓް (543 މިލިއަން ޑޮލަރު) ގަވައިދާ ހިލާފަށް ބަދަލުކުރުމުގެ މައްސަލާގައި ފައިސާ ނެގުމުގެ 21 ދައުވާ އާއި، ބާރުގެ ބޭނުން ނަހަމަގޮތުގައި ބޭނުންކުރުމުގެ 4 ދައުވާ ސާބިތުވެފައިވެއެވެ.
ކޮންމެ ދައުވާއަކަށް 15 އަހަރާއި 20 އަހަރާ ދެމެދުގެ ޖަލު ހުކުމެއް ކަނޑައެޅޭއިރު، ފައިނަލް ހުކުމް އަދި އިއުލާނުކޮށްފައެއް ނުވެއެވެ. ޕްރޮސެކިއުޓަރުން ނާޖިބްގެ މައްޗަށް ތުހުމަތުކުރީ، އޭނާ ބޮޑުވަޒީރުކަމާއި، ފިނޭންސް މިނިސްޓަރުކަމާއި، އެޑްވައިޒަރީ ބޯޑުގެ ޗެއާމަންގެ ހައިސިއްޔަތުން ބާރުގެ ބޭނުން ނަހަމަގޮތުގައި ބޭނުންކޮށް، އެ ފަންޑުން ބޮޑެތި އަދަދުތަކެއް އޭނާގެ އަމިއްލަ އެކައުންޓުތަކަށް ބަދަލުކޮށްފައިވާ ކަމަށެވެ.
ނަޖީބްގެ މައްޗަށް 2020 ވަނަ އަހަރުވެސް ކުށް ސާބިތުވެ، 1އެމްޑީބީ ފަންޑުން ގާތްގަނޑަކަށް 9.9 މިލިއަން ޑޮލަރު ނަހަމަ ގޮތުގައި ބޭނުންކުރުމުގެ ކުށުގައި 12 އަހަރުގެ ޖަލު ހުކުމެއް ކަނޑައެޅުނެވެ. އެ ހުކުމް ފަހުން ހަ އަހަރަށް ކުޑަކުރެވުނެވެ. މިފަހަރުގެ މައްސަލައަކީ 1އެމްޑީބީ އާ ސީދާ ގުޅިފައިވާ ފައިސާގެ ބޮޑު އަދަދުތަކެއް ހިމެނޭ މައްސަލައެކެވެ.
މި މައްސަލައިގެ ދިގު ޝަރީއަތް ހަތް އަހަރަށް ދެމިގެންދިޔައިރު، ނަޖީބް ވެސް ހިމެނޭ ގޮތަށް 76 ހެކިން ވަނީ ހެކިބަސް ދީފައެވެ. ނަޖީބުގެ އެންމެ ފަހުގެ ޝަރީއަތުގައި އޭނާ ވަނީ ދައުވާތަކަށް އިންކާރުކޮށް، 2016 ވަނަ އަހަރުން ފެށިގެން އިންޓަޕޯލުން ހޯދަމުންދާ މެލޭޝިއާގެ ފައިނޭންސިއަރު ޖޯ ލޯ އޭނާ މަގުފުރެއްދީ ކަމަށް ބުނެފައެވެ.
ނަމަވެސް، ފަނޑިޔާރު ވިދާޅުވީ، ނަޖީބް އާއި ލޯ އާ ދެމެދު ރަނގަޅު ގުޅުމެއް އޮތްކަން ހެކިތަކުން ދައްކާ ކަމަށެވެ. ނަޖީބުއަށް ލިބުނު ފައިސާއަކީ ސައުދީ ރަސްކަމުގެ ފަރާތުން ލިބުނު ހަދިޔާއެއް ކަމަށް އޭނާ ދެއްކި ދިފާއުވެސް ފަނޑިޔާރު ގަބޫލުނުކުރެއްވިއެވެ.
ނަޖީބްގެ މައްޗަށް ދަޢުވާތަކެއް ސާބިތުވެފައިވީ ނަމަވެސް، މެލޭޝިއާގެ ބައެއް ރައްޔިތުންގެ މެދުގައި އޭނާ އަދިވެސް މަޤުބޫލެވެ.