ރާއްޖޭގައި ޑްރަގުގެ ވިޔަފާރި ކުރާ ބޮޑުން މިހާރު އިނގޭ ކަމަށާއި އެ އެންމެން ޝަރީއަތުގެ ކުރިމައްޗަށް ގެންނާނެ ކަމަށް ދާޚިލީ ސަލާމަތާއި ފަންނިއްޔާތާ ބެހޭ ވަޒީރު އަލީ އިހުސާން ވިދާޅުވެއްޖެއެވެ.
ދައުލަތުގެ މީޑިއާގައި ރޭ ވާހަކަދައްކަމުން އިހުސާން ވިދާޅުވީ ޑްރަގުގެ ބޮޑުން މީގެކުރިން އަބަދުވެސް އިންތިހާބުތަކާއި ދިމާކޮށް ރައީސުލްޖުމްހޫރިއްޔާގެ އަފޫއާންމު ހޯދާ ކަމަށާއި އެގޮތުން ކުރީ ސަރުކާރުން ވެސް އިންތިހާބާ ދިމާކޮށް 25 އަހަރުގެ ޖަލު ހުކުމުގައި ތިބި ޑްރަގު ވިޔަފާރިކުރާ ފަރާތްތައް ޖަލުން ދޫކޮށްފައިވާ ކަމަށެވެ.
ނަމަވެސް މި ސަރުކާރުން ގާނޫނަށް ގެނައި އިސްލާހުތަކާއެކު ޑްރަގުގެ ބޮޑުންނަށް އަފޫއާންމު ދިނުމުގެ ފުރުސަތެއް މިހާރު ރައީސުލްޖުމްހޫރިއްޔާ އަށް ވެސް ނޯންނާނެ ކަމަށާއި އެ ބާރު ރައީސް ދޫކޮށްލެއްވީ މި މައްސަލަ ހައްލުކުރަން ބޭނުންވާތީ ކަމަށް އިހުސާން ވިދާޅުވި އެވެ. އަދި ޑްރަގު ވިޔަފާރިކުރާ ފަރާތްތަކުން ހޯދާފައިވާ މުދާ، ހޯދުނު ގޮތްތައް ގާނޫނީ ގޮތުން ނުދެއްކޭނަމަ އެ މުދާތައް ދައުލަތަށް ނަގާނެ ކަމަށާއި އަދި ޑްރަގު އައްޑާތައް ވެސް ދައުލަތަށް ނެގޭނެ ފުރުސަތު ގާނޫނުން މިހާރު ހޯދާފައިވާ ކަމަށް އިހުސާން ވިދާޅުވިއެވެ.
އިހުސާން ވިދާޅުވީ މީގެކުރިން މި ކަންކަން ކުރަން ގާނޫނީ ގޮތުންވެސް އޮތީ ފަހި މާހައުލެއް ކަމަށާއި ނަމަވެސް މިހާރު އެ މާހައުލެއް ނޯންނާނެ ކަމަށެވެ. އެގޮތުން މީގެކުރިން ތަހުގީގުކުރާއިރު ބޮޑަށް ބަލަނީ ހައްޔަރުކުރާ މީހާގެ އަތުގައި މަސްތުވާތަކެތި ހުރިތޯ ކަމަށާއި ނަމަވެސް ތަހުގީގުތައް މިހާރު ބައްޓަން ކުރަނީ ޑްރަގުގެ ވިޔަފާރިކުރާ ފަރާތްތައް ހޯދުމަށް ކަމަށް އިހުސާން ވިދާޅުވިއެވެ.
”މަސްތުވާތަކެތި ރާއްޖޭގައި ވިޔަފާރިކުރާ ބޮޑުން އަޅުގަނޑުމެންނަށް މިހާރު އިނގޭ. އެމީހުންނާ ދިމާލަށް ތަހުގީގުތައް އެދަނީ. އިރާދަކުރެވިއްޔާ އެ އެންމެން ޝަރީއަތުގެ ކުރިމައްޗަށް ގެންނާނަން،“ އިހުސާން ވިދާޅުވި އެވެ.
މަސްތުވާތަކެއްޗާ ދެކޮޅަށް ދާދި ފަހުން ފުލުހުން ވަނީ ”އޮޕަރޭޝަން އަލިމަގު“ ގެ ނަމުގައި ހާއްސަ އޮޕަރޭޝަނެއް ވެސް ފަށައިފަ އެވެ. އެ އޮޮޕަރޭޝަންގެ ތެރެއިން ހައްޔަރުކުރި މީހުންގެ ތެރެއިން 34 މީހެއްގެ މައްސަލައިގެ ތަހުގީގު ނިންމައި ދައުވާކޮށް ދޭން އެދި ޕްރޮސިކިއުޓަ ޖެނަރަލްގެ އޮފީހަށް ވަނީ ފޮނުވައިފަ އެވެ.