ކޮންމެ އުނދަގޫ ހާލަތެއްގައިވެސް ސަލާމަތަކަށްވީ މުސްލިމުންގެ ގޮތުގައި ތިބެ ދިވެހީން ހިފަހައްޓަމުންދާ ރިވެތި ހުލްގާއި ސުލޫކު ކަމުގައި ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.
ސުނާމީ ކާރިސާއަށް 21 އަހަރު ފުރުމާއި ގުޅިގެން އެކްސްގައި ކުރެއްވި ޕޯސްޓެއްގައި ރައީސް މުއިއްޒު ވިދާޅުވީ އަޅުގަނޑުމެންގެ ހިތްތަކުގެ އެންމެ ފުނަށް ފޭދިފަައިވާ އިސްލާމީ އަގީދާ މަގުދައްކަނީ ގައުމީ ކޮންމެ ކަމެއްގައިވެސް އެންމެން އެއްބައިވާން ކަމަށެވެ. އަދި އެކަކު އަނެކަކަށް ހެޔޮ ފޯރުވައި އިހުސާންތެރިކަމާއި އަޅައިލުން އިސްކޮށް، ގައުމު ބިނާކުރުމުގައި އަތުގުޅައިލުމަށް ކަމަށް ރައީސް ވިދާޅުވި އެވެ.
”ސުނާމީ ކާރިސާ ކުރިމަތިވީ ހިނދުވެސް، އަދި ދިވެހީން ކުރިމަތިލީ މި ނޫން ކޮންމެ އުނދަގޫ ޙާލަތެއްގައިވެސް އަޅުގަނޑުމެންގެ ސަލާމަތަކަށްވީ މުސްލިމުންގެ ގޮތުގައި ތިބެ ދިވެހީން ހިފަހައްޓަމުންދާ މި ރިވެތި ޚުލްޤާއި ސުލޫކު،“ ރައީސްގެ ޕޯސްޓްގައި ވިދާޅުވި އެވެ.
ރައީސްގެ ޕޯސްޓްގައި ވަނީ ދިވެހީންގެ ބަދަހިކަން އިތުރުކުރައްވާ ސަލާމަތާއި ރައްކާތެރިކަމުގައި މި ގައުމު އަބަދުމެ ލެއްވުމަށް އެދި ދުއާ ކުރައްވާފައެވެ.