މިއަދުގެ މި ރީތި ތާރީޚުގައި މާލޭގައި 34 ކައިވެނި ކުރަން ތާވަލު ކޮށްފައިވާކަން ފެމިލީ ކޯޓުން ހާމަ ކޮށްފިއެވެ.
މިއީ މިއަހަރު އަންނަ އެންމެ ފަހު ރީތި ތާރީޚެވެ.
ރީތި ތާރީޚުތަކުގައި ކައިވެނި ކުރުމަކީ ދުނިޔޭގެ އެހެން ޤައުމުތަކުގެ މީހުންނެކޭ އެއްފަދައިން ދިވެހީން ވެސް ވަރަށް ގަޔާވާ ކަމެކެވެ. އެގޮތުން އެހެން ދުވަސްތަކަށްވުރެ ގިނަ ކައިވެނި، ރީތި ތާރީޚުތަކުގައި ކުރާކަން ފާހަގަވެއެވެ.
ފެމިލީ ކޯޓުން ހާމަ ކޮށްފައިވާ ގޮތުގައި މާލޭގައި މިއަދު 34 ކައިވެނި ކުރަން ހަމަޖެހިފައިވާއިރު އޭގެ ތެރެއިން 13 ކައިވެންޏެއް ކޮށްދެނީ ކޯޓުގެ ރަސްމީ ގަޑީގައެވެ. އަދި 21 ކައިވެންޏެއް ކޮށްދެނީ ނުރަސްމީ ގަޑީގައިކަމަށް ވެސް ކޯޓުން ހާމަކޮށްފައިވެއެވެ.
މިއީ ހަމައެކަނި މާލޭގައި މިއަދު ކުރުމަށް ތާވަލު ކޮށްފައިވާ އަދަދުތައް ކަމަށްވާއިރު، އަތޮޅުތެރޭގެ ރަށްރަށުގައި ވެސް މިއަދު ގިނަ ކައިވެނިތަކެއް ކުރެވޭނެ ކަމަށް ބެލެވެއެވެ.