އެފްރިކަން ކަޕް އޮފް ނޭޝަންސް (އެފްކޮން) ގެ ގްރޫޕް ’ބީ‘ ގައި ރޭގައި ކުޅުނު މެޗުގައި ފަހު ވަގުތު މުހައްމަދު ސަލާހު ޖެހި ލަނޑާއެކު 2-1 އިން ޒިމްބާބްވޭ މައްޗަށް ކުރި ހޯދާ މިސްރުން މޮޅަކުން މުބާރާތް ފަށައިފިއެވެ.
އަދްރާރް ސްޓޭޑިއަމްގައި ރޭގައި ކުޅުނު މެޗުގައި އެންމެ ފުރަތަމަ ލަނޑު ޖަހާ މެޗުގެ ލީޑު ނަގާފައިވަނީ ޒިމްބާބްވޭއެވެ. މި ލަނޑަކީ މެޗުގެ 20 ވަނަ މިނެޓުގައި ޕްރިންސް ޑޫބް ކާމިޔާބު ކުރި ލަނޑެކެވެ.
ޒިމްބާބްވޭއިން ލަނޑު ޖެހުމާއެކު މިސްރުން ވަނީ އެ ޓީމުގެ ހަމަލާތައް ވަރުގަދަކޮށްފައެވެ. އެ ގޮތުން މެޗުގެ 64 ވަނަ މިނެޓުގައި އުމަރު މަރްމޫޝް ވަނީ ލަނޑެއް ޖަހާ މެޗުގެ ނަތީޖާ ހަމަހަމަ ކޮށްދީފައެވެ. މި ލަނޑަކީ ޕެނަލްޓީ އޭރިއާގެ އަރިމަތިން ގޮސް ގޯލުގެ މަތީ ދާގަނޑަށް ބޯޅަ ވައްދާލައިގެން އޭނާ ކާމިޔާބު ކުރި ލަނޑެކެވެ.
މިސްރަށް މެޗުގެ ނަތީޖާ އަނބުރާލެވުނީ މެޗުގެ ނުވަދިހަ މިނެޓު ހަަމަވެގެން ކުޅުނު އިތުރު ވަގުތުގެ ފުރަތަމަ މިނެޓުގައެވެ. މި ލަނޑު އެ ޓީމަށް ކާމިޔާބު ކޮށްދިނީ މުހައްމަދު ސަލާހެވެ. ސަލާހު މި ލަނޑު ކާމިޔާބު ކުރީ މަތިން އައި ބޯޅައެއް ކޮންޓްރޯލް ކޮށްލުމަށްފަހު ތިރީ ކަނަށް ބޯޅަ ވައްދާލައިގެންނެވެ.
މި ލިބުނު މޮޅާއެކު މިސްރުން މި ވަނީ މޮޅަކުން ގްރޫޕް ސްޓޭޖު ފަށާފައެވެ. ގްރޫޕް ’ބީ‘ ގައި މިސްރުގެ އިތުރުން ތިން ޕޮއިންޓު ލިބިފައިވަނީ ދެކުނު އެފްރިކާއަށެވެ.
