ތައިލެންޑާއި ކެމްބޯޑިއާގެ ބޯޑަރުގައި ހިންގަމުންދާ ހަނގުރާމަ ހުއްޓުމަށް މަސައްކަތް ކުރުމަށް މި ހަފްތާގެ ފަހުކޮޅު އަލުން މަޝްވަރާތައް ފަށާނެ ކަމަށް ތައިލެންޑުގެ ފޮރިން މިނިސްޓަރު ވިދާޅުވެއްޖެއެވެ.
މިދިޔަ އޮކްޓޯބަރު މަހު ވެސް މި ދެ ގައުމުގެ މެދުގައި ހަނގުރާމަ ހުއްޓުވުމުގެ އެއްބަސްވުމެއް، ވަރަށް ކުރު މުއްދަތެއްގައި އާދަޔާ ހިލާފަށް އަވަހަށް އެކުލަވާލެވުނެވެ.
މެލޭޝިއާގެ ކުއަލަލަމްޕޫރުގައި ބޭއްވި އެސޯސިއޭޝަން އޮފް ސައުތު އީސްޓް އޭޝިއަން ނޭޝަންސްގެ ޚާރިޖީ ވަޒީރުންގެ ބައްދަލުވުމަށް ފަހު ތައިލެންޑްގެ ފޮރިން މިނިސްޓަރު ސިހާސާކް ފުއަންކެޓްކޭއޯ އިއްޔެ ވިދާޅުވީ އޮކްޓޯބަރު މަހު ހަނގުރާމަ، ހުއްޓާލުމުގެ އެއްބަސްވުމުގެ މަރުހަލާތައް އަވަސް ކުރީ އެމެރިކާގެ ރައީސް ޑޮނަލްޑް ޓްރަމްޕަށް އެހީވެވޭނެ ގޮތް ހެދުމަށް ކަމަށެވެ.
އޭނާ ވަނީ މި ހަމަނުޖެހުން ނިމުމަކަށް ގެނައުމަށް ވެފައިވާ އެއްބަސްވުން ކުރިއަށް ގެންދެވޭނެ ކަމުގެ ޔަގީންކަން އޭރުވެސް ނެތްކަން ފާހަގަކުރައްވާފައެވެ.
ޝަރުތަކާ ނުލައި ހަނގުރާމަ ހުއްޓާލުމަށް ތައްޔާރަށް އޮތް ކަމަށް ކެމްބޯޑިއާ އިން ބުނި ނަމަވެސް، ކެމްބޯޑިއާ އިން ދުވަހަކުވެސް ސީދާ ހުށަހެޅުމެއް ނުލިބޭ ކަމަށާއި އެފަދަ ބަޔާންތަކަކީ މައްސަލަ ހައްލު ކުރުމަށް ވުރެ ބައިނަލްއަގްވާމީ ޕްރެޝަރު އިތުރު ކުރުމަށް ދެކެވޭ ވާހަކަތަކެއް ކަމަށް ތައިލެންޑުން ގަބޫލުކުރެއެވެ.
ދެ ގައުމު ބައިވެރިވާ އާންމު ބޯޑަރު ކޮމިޓީގެ މެންބަރުން މާދަމާ ބައްދަލުކޮށް ދާއިމީ ގޮތަކަށް ހަނގުރާމަ ހުއްޓާލުމަށް ތަފްސީލީ ފިޔަވަޅުތައް އެކުލަވާލާނެ ކަމަށް ވެސް އޭނާ ވިދާޅުވިއެވެ.