ކުރީގެ ބޮޑުވަޒީރު ޝައިހް ހަސީނާ ވެރިކަމުން ވައްޓާލި ޒުވާނުންގެ މުޒާހަރާގެ މަޝްހޫރު ލީޑަރަކު މަރުވުމާ ގުޅިގެން ބަންގްލަދޭޝްގައި ހަމަނުޖެހުންތައް ފެށިއްޖެއެވެ.
ޝަރީފް އުސްމާން ހާދީ މަރުވީ ހުސްވި ހަފްތާގައި ޑާކާގައި މިސްކިތަކުން ނުކުންނަނިކޮށް މޫނު ނިވާކޮށްގެން ހުރި މީހަކު އޭނާގެ ގަޔަށް ބަޑިޖެހުމުގެ ސަބަބުން ލިބުނު ޒަޚަމްތަކަށް ސިންގަޕޫރުގައި ފަރުވާ ދެމުން އަންނަނިކޮށް، ބުރާސްފަތި ދުވަހު އެވެ.
މި ހާދިސާ ހިނގީ 2024 ގައި ހިނގި ހަމަނުޖެހުންތަކަށް ފަހު ފުރަތަމަ ފަހަރަށް ގާނޫނު ހަދާ މަޖިލީހުގެ އިންތިހާބަށް ބަންގްލަދޭޝް ގެ ސަރުކާރުން ތާރީޚު އިއުލާނު ކޮށްފައިވަނިކޮށްނެވެ. ހާދީ މި އިންތިޚާބުގައި މިނިވަން ކެންޑިޑޭޓެއްގެ ގޮތުގައި ވާދަކުރާނެ ކަމަށް ވަނީ އިއުލާނު ކޮށްފަ އެވެ.
ބުރާސްފަތި ދުވަހު އޭނާ މަރުވި ހަބަރު ފެތުރުމާއެކު، އޭނާ އަށް ތާއީދު ކުރާ އެތައް ސަތޭކަ މީހުން ވަނީ މަގުތަކަށް ނުކުމެ މުޒާހަރާ ކޮށްފައެވެ. މުޒާހަރާކުރި މީހުން ބަންގްލަދޭޝްގެ މަޝްހޫރު ނޫހެއް ކަމަށް ވާ ދަ ޑެއިލީ ސްޓާރ ގެ އޮފީސް އިމާރާތެއް ގައި ރޯކޮށްލިއެވެ.
މުޒާހަރާ ކުރާ މީހުން ތުހުމަތު ކުރަމުން ދިޔައީ އޭނާގެ މަރުގެ ފަހަތުގައި އިންޑިއާ ގެ އަތެއް ވާ ކަމުގައެވެ. މުޒާހަރާ ކުރާ މީހުން ވަނީ ޗިޓަގޮން ގައި ހުންނަ އިންޑިއާގެ ޑިޕްލޮމެޓިކް މިޝަން އަކަށް ވެސް ހަމަލާ ދީފައެވެ. ރޯކޮށްލި އިމާރާތުގެ ސަރަހައްދަށް ގިނަ އަދަދެއްގެ ސިފައިން ފަހުން ޖަމާވި އެވެ. އަދި، އަލިފާން ނިއްވާ މީހުން އިމާރާތުގެ ތެރޭގައި ތާށިވެފައި ތިބި ނޫސްވެރިން ސަލާމަތް ކުރިއެވެ.
32 އަހަރުގެ ހާދީ އަކީ ދަރިވަރުންގެ އިހުތިޖާޖް ގުރޫޕް – އިންގިލާބް މަންޗާ ގެ ސީނިއަރ ލީޑަރަކަށް ވުމުގެ އިތުރުން އަވައްޓެރި އިންޑިޔާ އަށް ވަރަށް ބޮޑަށް ފާޑުކިޔާ ފަރާތެކެވެ. ވެރިކަމުން ވައްޓާލި ހަސީނާ އަދިވެސް އުޅެމުންދަނީ އިންޑިއާ ގައެވެ. ބަންގްލަދޭޝްގެ ސިޔާސީ ޕާޓީތަކުން ވަނީ އޭނާގެ މަރަށް ހިތާމަކުރާ ފާޅުކޮށް، ކުށްވެރިން އަދުލުގެ ކުރިމައްޗަށް ގެނައުމަށް އިންތިގާލީ ސަރުކާރަށް ގޮވާލައިފައެވެ.
ބަންގްލަދޭޝްގެ ވަގުތީ ސަރުކާރުގެ ވެރިޔާ ނޯބެލް އިނާމު ލިބިވަޑައިގެންފައިވާ މުހައްމަދު ޔޫނުސް، ހާދީގެ މަރަކީ ”ގައުމަށް ނުހަނު ބޮޑު ގެއްލުމެއް“ ކަމަށް ވިދާޅުވިއެވެ. ”ބިރުވެރިކަމާއި، ބިރުދެއްކުމާއި، ނުވަތަ ލޭ އޮހޮރުވައިގެން ގައުމު ޑިމޮކްރަސީ އަށް ދަތުރުކުރުން ހުއްޓުވޭކަށް ނެތް،“ އޭނާ ބުރާސްފަތި ދުވަހު ޓީވީ ގައި ދެއްކެވި ވާހަކަފުޅުގައި ވިދާޅުވިއެވެ.
ހާދީ ގެ މަރާ ގުޅިގެން އިންތިގާލީ ސަރުކާރުން ހޮނިހިރު ދުވަހަކީ ގައުމީ ހިތާމައިގެ ދުވަހެއްގެ ގޮތުގައި އިއުލާންކުރިއެވެ.