އަންނަ އަހަރު ބާއްވާ ލޯކަލް ކައުންސިލްތަކުގެ އިންތިހާބުގައި ޕީއެންސީގެ ޓިކެޓުގައި މާލޭގެ މޭޔަރު ކަމަށް ކުރީގެ ޗީފް އޮފް ޑިފެންސް ފޯސް މޫސާ އަލީ ޖަލީލް ކުރިމަތިލައްވަން ނިންމަވައިފިއެވެ.
ޕީއެންސީގެ ފަރާތުން މިއަދު ބޭއްވި ނޫސްވެރިންގެ ބައްދަލުވުމުގައި އެ ޕާޓީގެ ކެމްޕޭން މެނޭޖަރު އިބްރާހިމް ފަލާހު ވިދާޅުވީ، ޕީއެންސީގެ ޓިކެޓު ހޯދުމަށް ކުރިމަތިލުމުގެ ފުރުސަތު މިދިޔަ ހޯމަ ދުވަހު ހަމަވިއިރު މާލޭގެ މޭޔަރުގެ މަގާމަށް ފޯމު ހުށަހެޅުއްވީ މީޑިއާގައި އަޑު ފެތުރިފައިވާ ފަރާތް ކަމަށެވެ.
އެއީ ކުރީގެ ޑިފެންސް މިނިސްޓަރު މޫސާ އަލީ ޖަލީލެވެ.
މާލޭގެ މޭޔަރު ކަމުގެ ކެމްޕޭން ވަރަށް ފޯރިއާއެކު ކުރިއަށް އެބަދެއެވެ. އެގޮތުން އިދިކޮޅު އެމްޑީޕީގެ ޕްރައިމަރީގައި ވާދަކުރައްވަނީ މެދުހެންވޭރު ދާއިރާގެ ކުރީގެ މެންބަރު އަލީ އާޒިމާއި މިހާރުގެ މޭޔަރު އާދަމް އާޒިމެވެ.
ފަލާހު ވިދާޅުވީ ޕީއެންސީގެ ޕްރައިމަރީގައި ވާދަކުރައްވަން ރެކޯޑު އަދަދަކަށް ފޯމު ހުށަހަޅާފައިވާ ކަމަށެވެ. އެކަމުން ދައްކުވައިދެނީ އެ ޕާޓީއަށް މުޅި ރާއްޖޭގައި އޮތް ތާއީދު ކަމަށް އޭނާ ވިދާޅުވިއެވެ.
ޕީއެންސީގެ ޕްރައިމަރީ ބާއްވަނީ މި މަހުގެ 27 ގައިއެވެ. އެ ޕްރައިމަރީއަކީ ރާއްޖޭގައި މިހާތަނަށް ބޭއްވޭ އެންމެ ފޯރިގަދަ އެތެރޭގެ އިންތިހާބު ކަމަށް އޭނާ ވިދާޅުވިއެވެ.
ޕީއެންސީން ޕްރައިމަރީ ބާއްވަން ތައްޔާރުވިޔަސް އިދިކޮޅު އެމްޑީޕީގެ ޕްރައިމަރީ ބާއްވާނެ ދުވަހެއް އަދި ނޭނގެއެވެ.