ގަތަރުގައި މިހާރު ކުރިއަށްދާ ފީފާ އަރަބް ކަޕް 2025 ފުޓްބޯޅަ މުބާރާތުގެ ފައިނަލަށް މޮރޮކޯ އަދި ޖޯޑަން ދަތުރުކޮށްފިއެވެ.
ސެމީ ފައިނަލް ފުރަތަމަ މެޗުގައި ފަސޭހަކަމާއެކު މޮރޮކޯ ވަނީ 3-0 ގެ ނަތީޖާއަކުން ޔުނައިޓެޑް އަރަބި އެމިރޭޓްސް (ޔޫއޭއީ) ބަލިކޮށްފައެވެ.
މިމެޗުގެ ފުރަތަމަ ހާފުގައި މޮޅަށް ކުޅެ މޮރޮކޯ އިން މެޗު ޑޮމިނޭޓްކުރިއިރު އެޓީމު މެޗުގެ ލީޑުހޯދީ ފުރަތަމަ ހާފުގެ 28 ވަނަ މިނެޓުގައެވެ. މިލަނޑު އެޓީމަށް ކާމިޔާބުކޮށްދިނީ ފޯވާޑް ކަރީމް އަލް ބަކައުއީ އެވެ. އަދި އެޓީމުން ލީޑު ފުޅާކުރި ލަނޑު ދެވަނަ ހާފުގެ 83 ވަނަ މިނެޓުގައި މިޑްފީލްޑަރު އަސްކްރަފް އަލް މަހްދިއޫއީ ކާމިޔާބުކޮށްދިންއިރު އެޓީމުގެ ތިންވަނަ ލަނޑު މެޗުގެ އިތުރު ވަގުތުގެ ތެރޭގައި ކާމިޔާބުކޮށްދިނީ ތަޖްރިބާކާރު ފޯވާޑް އަބްދުއްރައްޒާޤު ހަމްދަﷲ އެވެ.
ޖޯޑަން ފައިނަލަށް ދަތުރުކުރީ ސެމީ ފައިނަލްގެ ދެވަނަ މެޗުގައި 1-0 ގެ ނަތީޖާއަކުން ސައުދީ އަރަބިއާ ބަލިކޮށްފައެވެ.
މިމެޗުގެ ފުރަތަމަ ހާފުގައި ގިނަވަގުތު ބޯޅަ ހިފަހައްޓައިގެން ކުޅެ ސައުދީ ޓީމުން މެޗު ޑޮމިނޭޓްކުރި ނަމަވެސް މިހާފުގައި ދެޓީމުންކުރެ އެއްވެސް ޓީމަކަށް ލަނޑުޖަހަނެ މާކަރަނގަޅު ހުސް ފުރުސަތުތަކެއް ތަނަވަސްކުރެވިފައެއް ނުވެއެވެ. އަދި މިހާފުގައި ޖޯޑަން އިން ވަނީ ރޭވުންތެރިކަމާއެކު ސައުދީގެ އެޓޭކުތައް ހުއްޓުވުމުގައި މޮޅު ޑިފެންސިވް ކުޅުމެއް ދައްކައިދީފައެވެ.
މެޗުގެ ދެވަނަ ހާފުގައި ވެސް ގިނަވަގުތު ބޯޅަ ހިފަހައްޓައިގެން ކުޅުނީ ސައުދީ އިންނެވެ. އަދި މިހާފުގައި ދެޓީމުން ވެސް ވަނީ ލަނޑުޖަހާނެ ރަނގަޅު ފުރުސަތުތަކެއް ތަނަވަސްކޮށްފައެވެ. އަދި މިމެޗުގައި ފެނިގެންދިޔަ ހަމައެކަނި ލަނޑު ދެވަނަ ހާފުގެ 66 ވަނަ މިނެޓުގައި ޖޯޑަން ޓީމަށް ކާމިޔާބުކޮށްދިނީ މިޑްފީލްޑަރު ނިޒާރު އަލް ރަޝްދާން އެވެ.
01 ޑިސެމްބަރު 2025 އިން 18 ޑިސެމްބަރު 2025 ގެ ނިޔަލަށް ގަތަރުގައި ކުރިއަށްދާ މިމުބާރާތުގައި 16 ޓީމަކުން ވާދަކުރިއިރު، މުބާރާތް ކުރިއަށްދަނީ ބައިވެރިވި 16 ޓީމު ހަތަރު ގުރޫޕަކަށް ބަހާލައިގެންނެވެ. އަދި ކޮންމެ ގުރޫޕަކުން ވެސް އެންމެ ރަނގަޅު ނަތީޖާއެއް ހޯދި ދެޓީމަށް މުބާރާތުގެ ކުއާޓާ ފައިނަލުން ވަނީ ފުރުސަތު ލިބިފައެވެ.
2012 ވަނަ އަހަރު ފީފާ އިން އަރަބި ކަޕްގެ ނަމުގައި ފުރަތަމަ މުބާރާތެއް ބޭއްވިއިރު، އެމުބާރާތުގެ ޗެމްޕިއަންކަން ހޯދީ މޮރޮކޯ އިންނެވެ. އަދި މެދުކެނޑުމަކަށްފަހު 2021 ވަނަ އަހަރު ބޭއްވި މުބާރާތް އަލްޖީރިއާ އިން ކާމިޔާބުކުރިއިރު މިއީ އަރަބި ގައުމުތަކަށް ޚާއްސަކޮށްގެން ފީފާ އިން ބާއްވާ ތިންވަނަ މުބާރާތެވެ.
މުބާރާތުގެ ފައިނަލް މެޗު އޮންނާނީ މިމަހުގެ 18 ވަނަ ދުވަހުގެ ރޭ ރާއްޖެ ގަޑިން 21:00 ގައި އެވެ. އަދި އެދުވަހުގެ ހަވީރު ރާއްޖެ ގަޑިން 16:00 ގައި ކުޅޭ މުބާރާތުގެ ތިންވަނަ ހޮވާ މެޗުގައި ސައުދީ އިން ނުކުންނާނީ ޔޫއޭއީ އާއި ދެކޮޅަށެވެ.