ވެލެންސިއާ ބަލިކޮށް ނިއު އިން ދިރާގު ޕްރިމިއާ ލީގުގެ ދެ ވަނަ ބުރު މޮޅަކުން ފަށައިފި އެވެ.
މި މެޗު ނިއުއިން ކާމިޔާބުކޮށްފައިވަނީ 3-1 ގެ ނަތީޖާއަކުންނެވެ.
ގަލޮޅު ދަނޑުގައި މިއަދު ކުޅުނު މެޗުގެ ލީޑު ނިއުއިން ނެގީ އެ ޓީމުގެ ބްރެޒިލް މިޑްފީލްޑަރު، ގޯމޭސް ޑަ ސިލްވާ ޖެހި ގޯލުންނެވެ.
ދެ ވަނަ ހާފުގައި ބަދަލަކާއެކު ނިއުއިން ނުކުތީ މި ފަހަރުގެ ޓްރާންސްފާ މާކެޓްގައި އެ ކްލަބާ އަލަށް ގުޅުނު މުހައްމަދު ފާސިރު (ފާއްޓެ) އާއެކުގައެވެ. ނިއުގެ ދެވަނަ ލަނޑު އެޓީމަށް ކާމިޔާބުކޮށްދިނީ ފާއްޓެއެވެ. އޭގެ ފަހުން ވެލެންސިއާގެ ކެޕްޓަން، އީތަން އިބްރާހިމް ޒަކީ އަރިމަތިން އަަރައި ނަގައިދިން ހުރަހަކުން އައިދު މުހައްމަދު ޖަވީޒުވަނީ މި މެޗުގައި ވެލެންސިއާގެ ހަމައެކަނި ލަނޑު ކާމިޔާބުކޮށްފައެވެ.
ނިއު އަށް މެޗުގެ ތިން ޕޮއިންޓް ޔަގީންކޮށްދިން ލަނޑު ޖަހައިދިނީ ހަސަން ރާއިފް އަހުމަދު (ހަންނަ) އެވެ.
ނިއު އިން ލީގުގެ ފުރަތަމަ ބުރު ނިންމާލީ ފަހު ތިން މެޗުން މޮޅެއް ނުލިބި އެވެ. ކްލަބް ގްރީން ސްޓްރީޓްސްއާއެކު ކުޅުނު މެޗު އެއްވަރުވިއިރު، އޮޑި ސްޕޯޓްސް ކްލަބާއި މާޒިޔާ ސްޕޯޓްސް އެންޑް ރެކްރިއޭޝަން އަތުން ވަނީ ބަލިވެފައެވެ.
ލީގުގެ ތިން ވަނައިގައި ނިއު އޮތީ 10 މެޗުން 20 ޕޮއިންޓާ އެކުއެވެ.