ގއ. ދެއްވަދޫ ބަނދަރު ތަރައްޤީ ކުރުމުގެ މަޝްރޫޢު ސަރުކާރުން މިއަދު އެމްޓީސީސީއާއި ހަވާލުކޮށްފިއެވެ.
މި މަޝްރޫޢު ހަވާލުކުރުމަށް މިއަދު ބޭއްވި ރަސްމިއްޔާތުގައި އިމާރާތްކުރުމާއި، ގެދޮރުވެރިކަމާއި ބިނާރާ ބެހޭ ވުޒާރާގެ ފަރާތުން ސޮއިކުރެއްވީ ސްޓޭޓް މިނިސްޓަރ، އަލްފާޟިލް ޙަސަން ރަޝީދު އެވެ. އަދި އެމްޓީސީސީގެ ފަރާތުން ސޮއިކުރެއްވީ ޑެޕިޔުޓީ މެނޭޖިންގ ޑައިރެކްޓަރ، އަޙްމަދު ޝަރީފު އަބްދުއްރަޙްމާން ޔޫސުފް އެވެ.
1,400 މީހުންގެ އާބާދީއެއް ހިމެނޭ ގއ. ދެއްވަދޫ ރައްޔިތުން ޢާންމުކޮށް މަސައްކަތް ކުރަނީ މަސްވެރިކަމުގެ ދާއިރާގައެވެ. މިގޮތުން ކަނޑުމަހުގެ މަސްވެރިކަން ކުރާ 12 ދޯނި ރަށުގައި މިހާރުވެސް އޮންނަކަމުގައި ދެއްވަދޫ ކައުންސިލުން މަޢުލޫމާތު ދެއްވައެވެ. މިހާރު ދެއްވަދޫގެ ރައްޔިތުންނަށް ދިމާވާ އެންމެ ބޮޑު ދައްޗަކީ ބަނދަރުން ޖާގަ ހޯދުމުގެ ދަތިކަންކަމަށްވެސް ކައުންސިލުން މަޢުލޫމާތު ދެއެވެ.
ދެއްވަދޫ ބަނދަރުގެ ޖާގަ ކުޑަވުމާއެކު މަސްދޯނިފަހަރާއި މުދާ އުފުލާ ބޯޓުތަކާއި ލޯންޗުތަކާއި އަދި ޑިންގީތައް ބަނދަރުގައި އަޅާފައި ބޭއްވުމުން ބަނދަރު އޮންނަނީ އެއްކޮށް ފުރި ތޮއްޖެހިފައެވެ.
މިއަދު ސޮއިކުރި ދެއްވަދޫ ބަނދަރު ތަރައްޤީ ކުރުމުގެ މަޝްރޫޢުގެ މަސައްކަތް ނިމުމާއެކު ޖާގަ ތަނަވަސް ބަނދަރެއް ރަށު ރައްޔިތުންނަށް ލިބިގެންދާނެއެވެ. ލަފާފުރުމުގައި މިހާރު ދިމާވަމުންދާ ދަތިތައް ހައްލުވެ ރަށު ރައްޔިތުންނަށް ބޮޑު ހިތްހަމަޖެހުމެއް ލިބެގެންދާނެއެވެ.
މި މަޝްރޫޢުގައި، 60,672 ކިއުބިކް މީޓަރުގެ ސަރަޙައްދެއްގެ ފަޅު ފުންކުރުމާއި 95,194 ކިއުބިކް މީޓަރުގެ ސަރަޙައްދަކަށް ވެލިއެޅުމާއި 29 މީޓަރުގެ ބޭރުތޮއްޓެއް ލުމާއި 407 މީޓަރުގެ ސަރަޙައްދެއްގައި އެއްގަމުތޮށި ލުމާއި 1,256 މީޓަރުގެ ސަރަޙައްދެއްގައި ރިވެޓްމެންޓް ޖެހުމާއި 20 މީޓަރު ދިގު 2 މީޓަރު ފުޅާ ބުރިޖެއް ހެދުމާއި 1,980 އަކަ މީޓަރުގެ ޕޭވްމެންޓެއް ހެދުމުގެ މަސައްކަތް ހިމެނެއެވެ. މި މަޝްރޫޢަކީ 103.09 މިލިއަން ރުފިޔާއަށް 630 ދުވަސްތެރޭ ނިންމުމަށް ހަވާލުކޮށްފައިވާ މަޝްރޫޢެކެވެ.