ކުޅުދުއްފުށީ ރީޖަނަލް ހޮސްޕިޓަލުގެ 43 ވަނަ އަހަރީ ދުވަހު ޓެލެމެޑިސިންގެ ޕައިލެޓް ޕްރޮޖެކްޓެއް އިފްތިތާހްކޮށްފިއެވެ.
ކުޅުދުއްފުށީ ރީޖަނަލް ހޮސްޕިޓަލުގެ 43 ވަނަ އަހަރީ ދުވަހުގެ މުނާސަބަތުގައި ބޭއްވި ހާއްސަ ރަސްމިއްޔާތެއްގައި، އެ ހޮސްޕިޓަލުގައި ޓެލެމެޑިސިންގެ ޕައިލެޓް ޕްރޮޖެކްޓް އިފްތިތާހުކޮށްދެއްވީ ރައީސުލްޖުމްހޫރިއްޔާގެ އަނބިކަނބަލުން ސާޖިދާ މުހައްމަދެވެ.
މި ހިދުމަތާއެކު، ހޮސްޕިޓަލުން ދެމުންދާ ސިއްހީ ހިދުމަތްތައް އިތުރަށް ފުޅާވެ، ރައްޔިތުންނަށް ފަސޭހައިން ތަފާތު ފަރުވާތައް ލިބިގެންދާނެއެވެ.
ކުޅުދުއްފުށީގައި ސިއްޙީ ހިދުމަތް 1960ގެ ފަހުކޮޅުން ފެށިގެން ދެމުން ދިޔަނަމަވެސް، އަސާސީ ހިދުމަތެއްގެ ގޮތުގައި އެ ހޮސްޕިޓަލުން ހިދުމަތް ފަށާފައިވަނީ 1982 ވަނަ އަހަރެވެ. މިވީ 43 އަހަރުގެ ތެރޭގައި، ކުޅުދުއްފުށީ ރީޖަނަލް ހޮސްޕިޓަލުންވަނީ ސިއްހީ ދާއިރާއިން ބޮޑެތި ކުރިއެރުންތަކެއް ހޯދާފައެވެ. އެގޮތުން، އަހަރީ ދުވަހުގެ މި ޚާއްސަ ޖަލްސާގައި ވަނީ ޓެލެމެޑިސިންގެ އިތުރުން ވެސް މުހިންމު ދެ ހިދުމަތެއް އިފްތިތާހުކޮށްފައެވެ.
ޓެލެމެޑިސިންގެ ހިދުމަތް ކުޅުދުއްފުށީ ރީޖަނަލް ހޮސްޕިޓަލުގައި ދެމުންގެންދާނީ އައިޖީއެމްއެޗާއި ފ.އަތޮޅު ހޮސްޕިޓަލާއި ގުޅިގެންނެވެ. މީގެ ސަބަބުން، ފ.އަތޮޅުގައި ނެތް ހިދުމަތްތައް ކުޅުދުއްފުށީ ހޮސްޕިޓަލުން އަދި ކުޅުދުއްފުށި ހޮސްޕިޓަލުގައި ނެތް ހިދުމަތްތައް އައިޖީއެމްއެޗް މެދުވެރިކޮށް ފޯރުކޮށްދެވޭނެއެވެ. މިއާއެކު ޓެސްޓުގެ ނަތީޖާ އޮންލައިންކޮށް ދައްކާލުންފަދަ ފަސޭހަތައް ވެސް ރައްޔިތުންނަށް ލިބިގެންދާނެއެވެ.
ޓެލެމެޑިސިންގެ އިތުރުން، ކުޅުދުއްފުށީ ރީޖަނަލް ހޮސްޕިޓަލުގައި ވަނީ ގައިންގަޔަށް ނާރާ ބަލި މީހުންނަށް ހާއްސަ ކްލިނިކެއްގެ އިތުރުން އެންޑޯމެޓްރިއޯސިސްގެ ހިދުމަތްވެސް ފަށައިފައެވެ. މި ހިދުމަތްތަކާއެކު ގައިންގަޔަށް ނާރާ ބަލިތަކުން ދުރާލާ ރައްކާތެރިވެވި ދުޅަހެޔޮ މުޖުތަމައެއް ބިނާވެގެންދާނެކަމަށް އެހޮސްޕިޓަލުން ވިދާޅުވެއެވެ. ހަމައެއާއެކު އަންހެނުންގެ ތެރޭގައި އޮތް ވޭންހުރި ބައްޔެއްގެ ގޮތުގައި އެންޑޯމެޓްރިއޯސިސް ފާހަގަކުރެވޭއިރު، މީގެފަރުވާ އިތުރަށް ފުޅާވެ، އެފަދަ ވޭން ތަހައްމަލު ކުރަމުންދާ ފަރާތްތަކަށް ފަސޭހައިން ހިދުމަތް ލިބޭނެ މަގުފަހިވާނެކަމަށްވެސް ހޮސްޕިޓަލުން ވިދާޅުވެއެވެ.