ދުނިޔޭގައި މިހާތަނަށް އުފެދުނު އެންމެ މޮޅު ފުޓްބޯޅަ ކުޅުންތެރިޔާ ކްރިސްޓިއާނޯ ރޮނާލްޑޯ ރެކޯޑު އަދަދެއްގެ މުސާރައަކަށް އިތުރު ދެ އަހަރު ސައުދީ ޕްރޯ ލީގުގެ އައް ނަސްރުގައި މަޑުކުރަނނިންމައިފި އެވެ.
އާ ޑީލަކާ އެކު، އުމުރުން 40 އަހަރުގެ ފޯވާޑް އައް ނަސްރުގައި 2027 ގެ ނިޔަލަށް ހުންނާނެ އެވެ.
މެންޗެސްޓާ ޔުނައިޓެޑްގެ އޭރުގެ ކޯޗު އެރިކް ޓެން ހާގާ މައްސަލަ ޖެހިގެން ކްލަބް ދޫކޮށްލައި ރޮނާލްޑޯ ވަނީ 2023 ވަނަ އަހަރުގެ ފުރަތަމަ ދުވަހު އައް ނަސްރާ ގުޅިފަ އެވެ. އޭރު އޭނާ ގުޅުނީ އަހަރަކު 200 މިލިއަން ޔޫރޯގެ އަގަކަށެވެ.
މީޑިއާތަކުން ރިޕޯޓް ކޮށްފައިވާ ގޮތުން، ރޮނާލްޑޯ އެއްބަސްވުން އާކުރީ އަހަރަކު 178 މިލިއަން ޕައުންޑް (209 މިލިއަން ޔޫރޯ) އަށެވެ. ހަފުތާއަކު 3.42 މިލިއަން ޕައުންޑާ އެކު، ކުރިއަށް އޮޮތް ދެ އަހަރު ތެރޭގައި 492 މިލިއަން ޕައުންޑްގެ މުސާރައެއް ލިބޭނެ ކަމަށް ލަފާކުރެވެ އެވެ.
މި އެއްބަސްވުމުގައި 33 މިލިއަން ޕައުންޑްގެ އައް ނަސްރުގެ ހިއްސާ ވެސް ހިމަނާފައިވާއިރު، އިތުރު ބޯނަސްތަކުގެ އިތުރުން 60 މިލިއަން ޕައުންޑްގެ ސްޕޮންސާޝިޕް ޑީލްތައް ވެސް ހިމެނެ އެވެ.
ސައުދީ ލީގުގެ ޓޮޕް ސްކޯރާގެ މަގާމު ހޯދައިގެން ބޯނަސްގެ ގޮތުގައި ހަތަރު މިލިއަން ޕައުންޑު ރޮނާލްޑޯ އަށް ހުށަހަޅާފައި ވެ އެވެ. އަދި ލީގު ކާމިޔާބު ކޮށްގެން އަށް މިލިއަން ޕައުންޑް ލިބޭނެ އެވެ. މީގެ އިތުރުން އޭނާ އަށް ހާއްސަ 16 މުވައްޒަފުން ވެސް ހަމަޖައްސާފައިވެ އެވެ. އެއީ ތިން ޑްރައިވަރާއި ހަތަރު މެއިޑުންގެ އިތުރުން ދެ ޝެފާއި ތިން ގާޑްނާރުން އަދި ހަތަރު ސެކިއުރިޓީ ކަމަށް އިނގިރޭސި މީޑިއާ ދަ ސަން އިން ބުންޏެވެ.
ރޮނާލްޑޯ ސައުދީ ލީގަށް ބަދަލުވުމާ ގުޅިގެން ޔޫރަޕްގެ ގިނަ ތަރިންތަކެއް ވަނީ ލީގުގެ އެކި ޓީމުތަކަށް ބަދަލުވެފަ އެވެ. އޭޣެ ތެރޭގައި އޭނާއާ އެކު ރެއާލް މެޑްރިޑަށް ބަދަލުވި ކަރީމް ބެންޒެމާ ވެސް ހިމެނެ އެވެ.