ރ.އަތޮޅު ކައުންސިލް ހޭންޑްބޯޅަ މުބާރާތް (އަރުތަ ހޭންޑްބޯޅަ 2025) ގެ ސެމީފައިނަލުގެ ފުރަތަމަ މެޗުގައި މިއަދު ހަވީރު އިނގުރައިދޫ އާއި ދުވާފަރު ކުޅުނު މެޗު ވާދަވެރި ކުޅުމަކަށްފަހު 10-14 ގެ ނަތީޖާއަކުން ކާމިޔާބުކޮށް ދުވާފަރު އިން މުބާރާތުގެ ފައިނަލަށް ދަތުރުކޮށްފިއެވެ.
ދުވާފަރު މުބާރާތުގެ ސެމީފައިނަލުން ޖާގަހޯދީ ގްރޫޕް ސްޓޭޗްގައި ކުޅުނު ހުރިހާ މެޗެއްވެސް ކާމިޔާބުކޮށް ސައްތައިގެ ރެކޯޑަކާއެކުއެވެ.
މެޗުގެ ފުރަތަމަ ހާފުގައި މޮޅަށް ކުޅެ ދުވާފަރުން މެޗު ޑޮމިނޭޓްކުރިއިރު، ފުރަތަމަ ހާފުގެ ކުޅުން ނިމިގެންދިޔައީ ހަތަރު ޕޮއިންޓްގެ ލީޑަކާއެކު 07-03 ގެ ނަތީޖާއަކުން ދުވާފަރު ކުރީގައި އޮވެގެންނެވެ. އަދި ދެވަނަ ހާފުގައި އެޓީމުން އިތުރު ހަތް ލަނޑު ކާމިޔާބުކުރިއިރު، މިހާފުގައި އިނގުރައިދޫ ވެސް އިތުރު ހަތް ލަނޑު ކާމިޔާބުކުރިއެވެ. އަދި މިމެޗުގެ މޮޅު ކުޅުންތެރިއަކަށް ހޮވުނީ ދުވާފަރު ޓީމްގެ ކެޕްޓަން އީނާ އަހްމަދުއެވެ.
ރ.އަތޮޅު ކައުންސިލް އިންތިޒާމުކޮށް ރ. ހުޅުދުއްފާރުގައި ކުރިއަށް ގެންދާ މި މުބާރާތުގައި މިއަހަރު ޖުމްލަ 8 ޓީމަކުން ބައިވެރިވިއިރު، މުބާރާތް ކުރިއަށް ގެންގޮސްފައި ވަނީ ބައިވެރިވި އަށް ޓީމު ދެ ގުރޫޕަކަށް ބަހާލައިގެންނެވެ. އަދި ކޮންމެ ގުރޫޕަކުން ވެސް އެންމެ ރަނގަޅު ނަތީޖާއެއް ހޯދާ ދެޓީމު ސެމީ ފައިނަލަށް ހޮވޭގޮތަށެވެ.
މިމަހުގެ 26 ވާ ބުރާސްފަތި ދުވަހު ކުޅޭ ފައިނަލް މެޗުގައި ދުވާފަރު ޓީމު ނުކުންނާނީ ސެމީފައިނަލްގެ ފުރަތަމަ މެޗުގައި އަނގޮޅިތީމުގެ މައްޗަށް ކުރި ހޯދި މައްޑުއްވަރި ޓީމާއި ދެކޮޅަށެވެ.
މިއީ މިމުބާރާތް ބާއްވާ 3 ވަނަ އަހަރަށް ވީއިރު، ވޭތުވެ ދިޔަ އަހަރުގެ ފައިނަލުގައިވެސް ދުވާފަރުގެ ޓީމުން ވަނީ ކުޅެފައެވެ. މީގެ ކުރިން ބޭއްވުނު 2 މުބާރާތް ކާމިޔާބުކޮށްފައިވަނީ އަނގޮޅިތީމާއި ކިނޮޅޮސް އެވެ.