އެމެރިކާއިން އީރާނަށް އިތުރު ހަމަލާއެއް ދީފިނަމަ، އަސްކަރީ މައިދާނަށް ނެރޭނެ އާ ހަތިޔާރުތަކާއި އާ އުކުޅުތަކުގެ ސަބަބުން މުޅި ދުނިޔެ އަޖައިބުވެގެންދާނެ ކަމަށް އީރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް (އައިއާރުޖީސީ) އިން އިންޒާރުދީފިއެވެ.
އަލް-އާލަމް ޓީވީއަށް ދެއްވި އިންޓަވިއުއެއްގައި އައިއާރުޖީސީގެ ތަރުޖަމާނު ބްރިގޭޑިއާ ޖެނެރަލް ހުސައިން މުހިއްބީ ވިދާޅުވީ، ދެމެހެއްޓެނިވި އަދި ދިގުލައިދާ ހަނގުރާމައަކަށް އީރާނުން އޮތީ ފުރިހަމައަށް ތައްޔާރުވެގެން ކަމަށާއި، ކުރިއަށް އޮތް ތަނުގައި ހަނގުރާމައިގެ ޖިއޮގްރަފީއާއި އަމާޒުތަކަށް ބޮޑެތި ބަދަލުތަކެއް އަންނާނެ ކަމަށެވެ.
ޖެނެރަލް މުހިއްބީ ވިދާޅުވި ގޮތުގައި ކުރީގެ ހަމަލާތަކުގައި އަމާޒުކުރި ތަންތަނުގެ އިތުރުން، މީގެ ކުރިން ހަމަލާދީފައިނުވާ އާ އަމާޒުތަކަށް އީރާނުން ހަމަލާދޭނެއެވެ. އަދި މިހާތަނަށް ބޭނުންކޮށްފައިނުވާ އިސްތިރާތީޖީ އާ ހަތިޔާރުތައް މައިދާނަށް ނެރުމަށް އީރާނުން ތައްޔާރުވެފައިވާ ކަމަށް އޭނާ ހާމަކުރެއްވިއެވެ. މީގެ އިތުރުން، ހޯރްމުޒް ކަނޑުއޮޅި ހުޅުވާލުމަށް އެމެރިކާގެ އަސްކަރިއްޔާއިން ކުރި މަސައްކަތް ނާކާމިޔާބުވެފައިވާ ކަމަށް ވިދާޅުވެ، އެމެރިކާއާއެކު އެއްވެސް ރަސްމީ ނުވަތަ އާންމު ސިޔާސީ މަޝްވަރާއެއް އައިއާރުޖީސީން ކުރިއަށް ނުގެންދާނެ ކަމަށްވެސް އޭނާ ވަނީ ވިދާޅުވެފައެވެ.
މެދުއިރުމަތީގެ ނުތަނަވަސްކަން އިންތިހާއަށް ބޮޑުވެފައިވާ މި ދަނޑިވަޅުގައި އީރާނުން ދިން މި އިންޒާރާއެކު، ހުޅަނގުގެ ގައުމުތަކާއި އިސްރާއީލުން ދަނީ ކަންބޮޑުވުން ފާޅުކުރަމުންނެވެ. އެ ގައުމުތަކުން ގަބޫލުކުރާ ގޮތުގައި އީރާނުގެ މިފަދަ އިންޒާރުތަކާއި އަސްކަރީ ހަރަކާތްތަކުގެ ސަބަބުން ސަރަހައްދީ ހަމަޖެހުމަށް އިތުރު ހުރަސްތަކެއް ކުރިމަތިވެ، ބައިނަލްއަގުވާމީ ހަކަތައިގެ ބާޒާރަށްވެސް ބޮޑެތި ނޭދެވޭ އަސަރުތަކެއް ކުރާނެއެވެ.
