ތިނަދޫ ކައުންސިލުން ގަވާއިދާ ހިލާފަށް ބިން ދޫކުރި މައްސަލައެއްގައި ދައުވާކުރަން ފޮނުވަނީ ގދ. ތިނަދޫ ކައުންސިލްގެ ހަތަރުވަނަ ދައުރުގައި ކައްކާ ގޭހުގެ ވިޔަފާރި ކުރުމަށް އަމިއްލަ ކުންފުންޏަކަށް ގަވާއިދާ ހިލާފަށް ބިން ދޫކޮށް ނާޖާއިޒު ފައިދާ ހޯދައިދިން ކަމަށް ތުހުމަތުކުރެވޭ މައްސަލައެއްގައި، އެ ކައުންސިލްގެ ކުރީގެ ރައީސާއި ތިން މެންބަރެއްގެ މައްޗަށް ދައުވާކޮށްދިނުމަށް އެދި އެންޓި ކޮރަޕްޝަން ކޮމިޝަނުން ޕްރޮސިކިއުޓާ ޖެނެރަލްގެ އޮފީހަށް ފޮނުވަން ނިންމައިފިއެވެ.
އޭސީސީން ހާމަކޮށްފައިވާ ގޮތުގައި، ދިރިއުޅުމުގެ ބޭނުމަށް ނޫން އެހެނިހެން ބޭނުންތަކަށް ބިން ދޫކުރުމުގެ ގަވާއިދުގައިވާގޮތުން ބީލަމަށް ހުޅުވާނުލައި ސިނާއީ ނުވަތަ ވިޔަފާރީގެ ބޭނުމަށް ބިން ދޫކުރުމަކީ މަނާކަމެކެވެ. ނަމަވެސް އެ އުސޫލުތަކާ ހިލާފަށް ތިނަދޫ ކައުންސިލްގެ ހަތަރުވަނަ ދައުރުގެ ވެރިން ވަނީ ވަކި ކުންފުންޏަކަށް އިއުލާން ކުރުމަކާ ނުލައި ބިންތަކެއް ދޫކޮށްފައެވެ. މި މައްސަލައިގެ ތަހުގީގުން ދައްކާގޮތުން، ގަވާއިދާ ހިލާފަށް ދޫކުރި އެއް ބިމުގެ އިތުރުން 2000 އަކަފޫޓުގެ އިތުރު ތިން ބިން ވެސް އެ ކުންފުންޏަށް ނާޖާއިޒު ގޮތުގައި ވަނީ ދޫކޮށްފައެވެ.
މި މައްސަލައާ ގުޅިގެން ދައުވާކޮށްދިނުމަށް އެދި ޕީޖީ އޮފީހަށް ފޮނުވަން ނިންމާފައިވަނީ އޭރުގެ ކައުންސިލް ރައީސް ސައުދު އަލީ އާއި، ކައުންސިލްގެ މެންބަރުން ކަމަށްވާ އާމިނަތު ނަސީމާއާއި، އަހުމީމާ އަހުމަދު އަދި އާއިޝަތު ލިއުޝާ ޒުބައިރުގެ މައްޗަށެވެ. އެ ފަރާތްތަކުގެ މައްޗަށް އުފުލުމަށް ނިންމާފައިވަނީ ދިވެހިރާއްޖޭގެ ގާނޫނުލްއުގޫބާތުގެ ދަށުން ރަސްމީ ހައިސިއްޔަތު ނަހަމަ ގޮތުގައި ބޭނުންކުރުމުގެ ކުށުގެ ދައުވާއެވެ.
މި މަހުގެ ދިހަވަނަ ދުވަހު އޭސީސީން ނިންމާފައިވާ މި ނިންމުމަކީ ވިޔަފާރި އުސޫލުތަކުން ބިންތައް ދޫކުރުމުގައި ދެފުށް ފެންނަ އިންސާފުވެރި ނިޒާމެއް ގާއިމުކުރުމަށް އެޅުނު މުހިންމު ފިޔަވަޅެކެވެ.