އިންޑިއާގެ އެފްކޮންސް ކުންފުނިން ކުރިއަށް ގެންދާ ތިލަމާލެ ބްރިޖު މަޝްރޫއުގެ ދަށުން މާލެއާ ވިލިމާލެ ގުޅޭ ބްރިޖުން، ރައީސުލްޖުމްހޫރިއްޔާ ޑރ. މުހައްމަދު މުޢިއްޒު މިއަދު ހިންގަވާފައި މާލެ އިން ވިލިމާލެއަށް ވަޑައިގެންފިއެވެ.
ބްރިޖު މަޝްރޫއުގެ ދަށުން މާލެއާ ވިލިމާލެ އަދި ވިލިމާލެއާ ގުޅިފަޅުގެ އިތުރުން ގުޅިފަޅާއި ގިރާވަރުފަޅު ގުޅާލާނެ އެވެ. އޭގެތެރެއިން މާލެއާ ވިލިމާލެ މިހާރު ވަނީ ބްރިޖުން ގުޅާލާފަ އެވެ. ބްރިޖުގެ މައިގަނޑު މަސައްކަތް ނިންމާ ގުޅުވާލީ ދާދި ފަހުންނެވެ.
މިއަދު ފާހަގަކުރަމުންދާ އިންޖިނޭރުންގެ ދުވަހާއި ގުޅިގެން ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ވަނީ ތިލަމާލެ ބްރިޖު މަޝްރޫއު ކުރިއަށްދާ ގޮތް ބައްލަވާލައްވާފަ އެވެ. އެގޮތުން ރައީސް ވަނީ ބްރިޖުގައި، މާލެ އިން ވިލިމާލެއަށް ހިންގަވާފައި ވަޑައިގެންފައެވެ.
ރައީސްގެ އަރިހުގައި ވަޒީރުންނާއި އެފްކޮންސްގެ ވެރީންނާއި ކުންފުނިތަކުގެ ވެރީންގެ އިތުރަށް ނޫސްވެރީން ވެސް ބައިވެރިވިއެވެ.
އޭގެ ފަހުން ރައީސް ވަނީ ނޫސްވެރީންނާއި ވެސް ބައްދަލު ކުރައްވާފަ އެވެ. ރައީސް ވިދާޅުވީ އަމާޒަކީ ކުރިއަށް އޮތް އަހަރެއްހާ ދުވަހުގެ ތެރޭގައި މުޅި މަޝްރޫޢުގެ މަސައްކަތް އެއްކޮށް ފުރިހަމަކުރުން ކަމަށެވެ. އަދި މަޝްރޫއުގެ ކޮލިޓީއާމެދު އެއްވެސް ސުވާލެއް ނެތް ކަމުގައި ވިދާޅުވިއެވެ.