ރައްޔިތުންގެ ޓެކްސް ފައިސާ ހިމެނޭހެން ސިޔާސީ ޕާޓީތަކަށް ލިބޭ އާމްދަނީއާއި ކުރާ ޚަރަދުތައް ދެނެގަތުމަށް، އިލެކްޝަންސް ކޮމިޝަން (އީސީ) އާއި އޮޑިޓަރ ޖެނެރަލްގެ އޮފީސް ގުޅިގެން ޚާއްޞަ އުސޫލެއް އެކުލަވާލައި ގެޒެޓްކުރުމުގެ މަސައްކަތް ފަށައިފިއެވެ.
ދައުލަތުގެ މީޑިއާގައި ވާހަކަދައްކަވަމުން އީސީގެ މެންބަރު ޙަސަން ޒަކަރިއްޔާ ހާމަކުރެއްވި ގޮތުގައި، އަލަށް ތަޢާރަފުކުރާ މި އުސޫލަކީ ފާއިތުވި ދެ އަހަރު ދުވަހުގެ ތެރޭގައި ހުރިހާ ސިޔާސީ ޕާޓީތަކެއްގެ މަޝްވަރާއާ އެކު އެކުލަވާލައި ނިންމާފައިވާ އުސޫލެކެވެ. އޭނާ ފާހަގަކުރެއްވި ގޮތުގައި މިހާރު ޕާޓީތަކުގެ މާލީ ކަންކަން އާންމު ގޮތެއްގައި ރަނގަޅަށް ބެލެހެއްޓި ނަމަވެސް، އެންމެން ޢަމަލުކުރާނެ ވަކި މިންގަނޑެއް ނެތުމުގެ ސަބަބުން ބައިނަލްއަޤްވާމީ އޮޑިޓިންގ ސްޓޭންޑަޑްތަކާއި ރާއްޖޭގެ މާލިއްޔަތު ޤަވާއިދާ ފުށުއަރާ މައްސަލަތައް ދިމާވެއެވެ.
ސިޔާސީ ޕާޓީތަކުގެ ޤާނޫނު ބަޔާންކުރާ ގޮތުން، ދައުލަތުގެ ބަޖެޓުން ފައިސާ ލިބޭ ޕާޓީތަކާއި ނުލިބޭ ޕާޓީތަކުން ވެސް އަހަރީ މާލީ ބަޔާން ލައިސެންސް އޮންނަ އޮޑިޓަރަކު މެދުވެރިކޮށް އީސީއަށް ހުށަހެޅުމަކީ ލާޒިމުކަމެކެވެ.
ޙަސަން ޒަކަރިއްޔާ ވިދާޅުވީ، “ރައްޔިތުންގެ ފައިސާ ޚަރަދުކުރެވޭ ގޮތް ވަރަށް ސާފުކޮށް އާންމުންނަށް އެނގެން ޖެހޭނެ” ކަމަށާއި، އޮޑިޓަރުން ފާހަގަކުރާ ކުދިކުދި މައްސަލަތަކަށް ވެސް ކޮމިޝަނުން ފާރަވެރިވެ ފިޔަވަޅު އަޅާނެ ކަމަށެވެ.
ކޮންމެ މީލާދީ އަހަރެއްގެ ފުރަތަމަ ތިން މަސްދުވަހުގެ ތެރޭގައި މާލީ ބަޔާން ހުށަހަޅަންޖެހޭއިރު، މި މުއްދަތުގައި ބަޔާން ހުށަނާޅައިގެން މި އަހަރު ވެސް ތިން ޕާޓީއަކަށް ވަނީ ފިޔަވަޅު އަޅާފައެވެ. އެގޮތުން، މޯލްޑިވްސް ނޭޝަނަލް ޕާޓީ (އެމްއެންޕީ) އާއި އަދާލަތު ޕާޓީން ބަޔާން ހުށަހަޅާފައި ނުވާއިރު، މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) އިން ރިޕޯޓު ހަވާލުކުރީ މުއްދަތު ހަމަވިތާ ހަފުތާއެއް ފަހުންނެވެ.
އިލެކްޝަންސް ކޮމިޝަނުން ބުނި ގޮތުގައި، ކަނޑައެޅިފައިވާ މުއްދަތުގައި މާލީ ބަޔާން ހުށަނާޅާ ހާލަތްތަކުގައި، ސިޔާސީ ޕާޓީގެ އިތުރުން އެ ޕާޓީއެއްގެ މާލީ ކަންކަމާ ހަވާލުވެ ހުންނަ ފަރާތް ވެސް ޒިންމާދާރުކުރުވައި ޖޫރިމާނާކުރެވޭނެއެވެ. އަލަށް އެކުލަވާލާ އުސޫލުގެ ސަބަބުން މިފަދަ މައްސަލަތަކަށް ދާއިމީ ހައްލެއް ލިބިގެންދާނެ ކަމަށް އީސީން އުންމީދު ކުރެއެވެ.