ހިތަދޫ އުތުރު ދާއިރާގެ ބައި-އިލެކްޝަންގައި ޕީއެންސީއަށް ލިބުނު ނަތީޖާއިން އެ ޕާޓީގެ މުސްތަގުބަލު އުޖާލާކަން ހާމަވެފައިވާ ކަމަށާއި، ކަންކަން ރަނގަޅުކޮށް ކުރިއަށް އޮތް އިންތިހާބުތައް ކާމިޔާބު ކުރެވޭނެ ކަމަށް ސްޕޯޓްސް މިނިސްޓަރު އަބްދުﷲ ރާފިއު ވިދާޅުވެއްޖެއެވެ.
ހިތަދޫ އުތުރު ދާއިރާގެ ބައި-އިލެކްޝަންގައި ޕީއެންސީގެ ކެމްޕެއިން މެނޭޖަރުގެ ގޮތުގައި މަސައްކަތް ކުރެއްވި މިނިސްޓަރު ރާފިއު ވިދާޅުވީ، އިންތިހާބު ކާމިޔާބު ނުވި ނަމަވެސް ކުރެވުނީ ވަރަށް ކާމިޔާބު މަސައްކަތްތަކެއް ކަމަށެވެ.
މިދިޔަ ހޮނިހިރު ދުވަހު ބޭއްވި މި އިންތިހާބު ކުޑަ ތަފާތަކުން ކާމިޔާބު ކުރެއްވީ އިދިކޮޅު އެމްޑީޕީގެ ކެންޑިޑޭޓް، އައްޑޫ ސިޓީގެ ކުރީގެ މޭޔަރު އަބްދުﷲ ސޯދިގު (ސޯބެ) އެވެ. އޭނާއަށް 1375 ވޯޓު ލިބިވަޑައިގަތްއިރު، ޕީއެންސީގެ ކެންޑިޑޭޓް އަހުމަދު ސައީދު (ސޮޑާ) އަށް ލިބިވަޑައިގަތީ 1313 ވޯޓެވެ. މި އިންތިހާބުގެ ނަތީޖާ އެމްޑީޕީއަށް އެނބުރިގެން ދިޔައީ މާލޭގައި ބެހެއްޓި ފޮށިތަކުންނެވެ.
ޕީއެންސީން ބޭއްވި ހަރުގެ ޖަލްސާއެއްގައި ވާހަކަދައްކަވަމުން ރާފިއު ވަނީ، ހިތަދޫގައި ބެހެއްޓި ފޮށިތަކުގެ ނަތީޖާއިން ޕާޓީއަށް އިތުރު ކުރިއެރުންތައް ހޯދުމަށް އަލިމަގެއް ފެނިފައިވާކަން ފާހަގަކުރައްވާފައެވެ. އިތުރަށް މަސައްކަތް ކޮށްފިނަމަ މިއަށްވުރެ ބޮޑެތި ކާމިޔާބީތައް ލިބޭނެކަން މި އިންތިހާބުން ސާބިތުވެއްޖެ ކަމަށް އޭނާ ވިދާޅުވިއެވެ. މީގެ އިތުރުން، ކެމްޕެއިންގެ ތެރޭގައި ރައީސުލްޖުމްހޫރިއްޔާ ޑރ. މުހައްމަދު މުއިއްޒާއި ޕާޓީގެ އިސްވެރިންގެ ފަރާތުން ލިބިވަޑައިގަތް ފުރިހަމަ އެއްބާރުލުމަށް ރާފިއު ވަނީ ހާއްސަ ޝުކުރެއް އަދާކުރައްވާފައެވެ.
ސަރުކާރުން އަބަދުވެސް މަސައްކަތް ކުރަމުންދަނީ ރައްޔިތުންނާ ގާތުން، ރައްޔިތުންގެ ބޭނުންތައް ފުއްދައިދިނުމަށް ކަމަށް މިނިސްޓަރު ވިދާޅުވިއެވެ. މިގޮތުން، ކުޅިވަރުގެ ދާއިރާއިން އައުޓްޑޯ ޖިމްތަކާއި ފުޓްސަލް ދަނޑުތައް ފަދަ އުމްރާނީ ވަސީލަތްތައް ގާއިމުކޮށް، ކުރު މުއްދަތެއްގެ ތެރޭގައި އޭގެ ފައިދާ ރައްޔިތުންނަށް ފޯރުކޮށްދިނުމަށް ސަރުކާރުން އިސްކަމެއް ދޭކަން އޭނާ ފާހަގަކުރެއްވިއެވެ.
ދާއިރާ ތަމްސީލުކުރަން ހުންނަނީ ކޮންމެ ޕާޓީއެއްގެ މެންބަރެއް ކަމުގައި ވިޔަސް، ސަރުކާރުން މަސައްކަތް ކުރާނީ ރައްޔިތުންގެ ލާބައާއި މަންފާއަށް ކަމުގެ ޔަގީންކަން ރާފިއު ދެއްވިއެވެ. އަދި ކުރިއަށް އޮތް ތަނުގައި މަސައްކަތްތައް އިތުރަށް ތަރުތީބުކޮށް، ވަރުގަދަ އަޒުމަކާއެކު ސަރުކާރުން ކުރިއަށްދާނެ ކަމަށްވެސް އޭނާ ވިދާޅުވިއެވެ.