މި އަހަރުގެ ޢަރަފާތު ދުވަހުގެ ޚުޠުބާ ދިވެހި ބަހަށް ތަރުޖަމާކޮށް، ދިވެހިރާއްޖޭގެ ޤައުމީ ޓީވީން ވަގުތުން ދައްކާނެ ކަމަށް އިސްލާމިކް މިނިސްޓަރ ޑރ. މުޙައްމަދު ޝަހީމް ޢަލީ ސަޢީދު ހާމަކުރައްވައިފިއެވެ.
މިނިސްޓަރ ޝަހީމް ވިދާޅުވި ގޮތުގައި މި ޚުޠުބާ ލައިވްކޮށް ތަރުޖަމާކުރެވެނީ ދިވެހިރާއްޖޭގެ އިސްލާމީ ކަންތައްތަކާ ބެހޭ ވުޒާރާއާ ގުޅިގެންނެވެ. މީގެ ބޭނުމަކީ ބަރަކާތްތެރި ޚުޠުބާގެ މާތް އީމާންތެރިކަމާ ގުޅޭ އަދި އިންސާނީ މެސެޖުތައް ދިވެހި މުޖުތަމަޢަށް ފޯރުކޮށްދީ، އެއިން ފައިދާ ހޯދުމުގެ ފުރުޞަތު ހޯދައިދިނުން ކަމަށް މިނިސްޓަރ ވިދާޅުވިއެވެ.
މިނިސްޓަރ ޝަހީމް ވަނީ މި ޚުޠުބާއިން ފައިދާ ލެއްވުމަށާއި، ޙައްޖުވެރިންގެ ޙައްޖު ޤަބޫލުކުރެއްވުމަށާއި، މުސްލިމުންގެ ހެޔޮ ޢަމަލުތައް ޤަބޫލުކުރެއްވުން އެދި ދުޢާ ކުރައްވައިފައެވެ.