20 އަހަރުން ދަށުގެ ސާފް ޗެމްޕިއަންޝިޕްގައި ފަހު ވަގުތު ނޭޕާލުން ޖެހި ލަނޑާއެކު 1-1 އިން އެއްވަރުވެ، ސާފް ޗެމްޕިއަންޝިޕްގެ ސެމީ ފައިނަލަށް ނުގޮސް ރާއްޖެ ކަޓައިފިއެވެ.
މުބާރާތުގެ ގްރޫޕް ’އޭ‘ ގެ ފަހު މެޗަށް ރާއްޖެ ނިކުތީ ސެމީގެ ޖާގައެއް ހޯދުމަށް މޮޅުވުން މަޖުބޫރު ހާލަތެއްގައެވެ. މެޗުގެ ބޮޑުބައި ރާއްޖެއިން ކޮންޓްރޯލްކޮށް ކުރީގައި އޮތް ނަމަވެސް، މެޗު ނިމެން ތިން މިނިޓަށް ވެފައި ވަނިކޮށް ނޭޕާލުން ވަނީ ނަތީޖާ ހަމަހަމަކޮށް ރާއްޖެ މުބާރާތުން ބޭރުކޮށްލާފައެވެ.
މެޗުގެ 15 ވަނަ މިނެޓުގައި އީތަން އިބްރާހިމް ޒަކީ ތަނަވަސްކޮށްދިން ފުރުސަތެއްގައި ކެޕްޓަން މުހައްމަދު އިލާން އިމްރާން ވަނީ ވާތު ފައިން ބޯޅަ ގޯލުގެ ކަނަށް ފޮނުވާލައި ރާއްޖެއަށް ކުރިހޯދައިދީފައެވެ. އަދި 87 ވަނަ މިނެޓުގައި ހިލޭ ޖެހުމަކުން ސުބާޝް ބާމް ނެގި ބޯޅައެއް، ނިޝާން ރާޖް ލަވަތު ބޮލުން ޖަހައި ގޯލުގެ ތެރެއަށް ފޮނުވާލައިގެން ނޭޕާލަށް ސެމީގެ ޖާގަ ކަށަވަރުކޮށްދިނެވެ.
ރާއްޖެއަށް މެޗުގެ ކުރީކޮޅު ލީޑު ފުޅާކުރަން ރަނގަޅު ފުރުސަތުތަކެއް ލިބުނެވެ. އެގޮތުން މެޗުގެ ދެވަނަ މިނިޓުގައި ނާޝިއު އަހުމަދު ޝިހާމް ބޮލުން ފޮނުވާލި ހަމަލާ އަމާޒުވީ ގޯލުގެ ހުރަސް ދަނޑިއަށެވެ. އަދި މެޗުގެ ފަހު ސިކުންތުކޮޅުގައި ކެޕްޓަން އިލާންއަށް ލިބުނު ރަން ފުރުސަތު ގޯލުގެ މަތިން ބޭރަށް ދިއުމާއެކު، ރާއްޖޭގެ ދަތުރު މިވަނީ ގްރޫޕް ސްޓޭޖުން ނިމުމަކަށް އައިސްފައެވެ.
މި ނަތީޖާއާއެކު ނޭޕާލް ވަނީ 7 ޕޮއިންޓާއެކު ގްރޫޕުގެ އެއްވަނަ ޓީމުގެ ގޮތުގައި ސެމީއަށް ދަތުރުކޮށްފައެވެ. ރާއްޖެއަށް ލިބުނީ 2 ޕޮއިންޓެވެ. ގްރޫޕުގެ ދެވަނަ ޖާގައަށް ވާދަކުރަނީ 3 ޕޮއިންޓާއެކު އޮތް ސްރީލަންކާ އާއި 1 ޕޮއިންޓާއެކު އޮތް ބޫޓާނެވެ.