އީރާނުގެ އެންމެ މަތީ ވެރިޔާ ނުވަތަ ސުޕްރީމް ލީޑަރު ކަނޑައެޅުމުގެ ތެރެއަށް ވަންނަން ބޭނުންވާ ކަމަށް އެމެރިކާގެ ރައީސް ޑޮނަލްޑް ޓްރަމްޕް ބުނެފިއެވެ.
އަވަހާރަކޮށްލާފައިވާ އީރާނުގެ ސުޕްރީމް ލީޑަރު އަލީ ޚާމަނާއީގެ މަގާމަށް، އޭނާގެ ދަރިކަލުން މުޖުތަބާ ޚާމަނާއީ އައްޔަންކުރުމާ ދެކޮޅަށް ޓްރަމްޕް ބުރާސްފަތި ދުވަހު ވަނީ ވާހަކަދައްކަވާފައެވެ. ”އެމީހުން އެ ބޭކާރު ކުރަނީ ވަގުތު. ޚާމަނާއީގެ ދަރިފުޅަކީ އެވަރުގެ މީހެއް ނޫން. އެ މަގާމަށް މީހަކު އައްޔަންކުރުމުގެ ތެރޭގައި އަހަރެން ހިމެނެންޖެހޭނެ،“ އެކްސިއޯސް ނޫހަށް ދިން ބަސްދީގަތުމެއްގައި ޓްރަމްޕް ބުންޏެވެ. އޭނާ އިތުރަށް ބުނީ އޭނާ ބޭނުންވަނީ މިދިޔަ ޖެނުއަރީ މަހު އެމެރިކާގެ ސިފައިން ވެނެޒުއޭލާގެ ރައީސް ނިކޮލަސް މަދޫރޯ ހައްޔަރުކުރުމާ ގުޅިގެން، އޭނާގެ ބަދަލުގައި ވެރިކަމާ ހަވާލުވި ޑެލްސީ ރޮޑްރިގޭޒް ފަދަ ލީޑަރެއް އީރާނަށް ގެންނަން ކަމަށެވެ.
ކުރިން މަދޫރޯގެ ނައިބު ރައީސްގެ މަގާމުގައި ހުންނެވި ނަމަވެސް، ރޮޑްރިގޭޒް ވަނީ ވެނެޒުއޭލާގެ ތެޔޮ ވިއްކުމުގެ ފުރުސަތު ވައިޓް ހައުސްއަށް ދީފައެވެ. އަދި އެމެރިކާއިން އިތުރު ހަމަލާތަކެއް ދީފާނެ ކަމުގެ ބިރު އޮތުމާއެކު، ކިއުބާއަށް ތެޔޮ ފޯރުކޮށްދިނުން އޭނާ ވަނީ ހުއްޓާލާފައެވެ. އީރާނުން ވެސް ރޮޑްރިގޭޒް ފަދަ ގޮނޑިކޮއްކޮ ލީޑަރަކު ހޯދަން ބޭނުންވާ ކަމަށް ޓްރަމްޕް ތަކުރާރުކޮށް ބުނަމުން ގެންދެއެވެ.
މި ހަފުތާގެ ކުރީކޮޅު ނޫސްވެރިންނާ ވާހަކަދައްކަމުން ޓްރަމްޕް ބުނީ، ވެނެޒުއޭލާގެ ކަންތައް ދިޔައީ ވަރަށް ފުރިހަމައަށް ކަމަށާއި، އެމެރިކާއިން ހަމަލާދީ ސަރުކާރު ދަމަހައްޓައި، މިހާރު އެތަނުގައި ހުރި ޑެލްސީ ރޮޑްރިގޭޒަކީ ވަރަށް ރަނގަޅު މީހެއް ކަމަށެވެ. ނަމަވެސް، އީރާނާއި ވެނެޒުއޭލާއާ ދެމެދު ބޮޑެތި ތަފާތުތަކެއް އެބަހުއްޓެވެ. މަދޫރޯ ހައްޔަރުކުރުމަކީ އަވަސް އަދި ވަކި އަމާޒުތަކަކަށް ދިން އަސްކަރީ އޮޕަރޭޝަނެއް ނަމަވެސް، އީރާނުގެ ސަރުކާރު މިހާރު އޮތީ އެމެރިކާއާއި އިޒްރޭލާ އެކު ފުޅާވަމުންދާ ހަނގުރާމައެއްގެ ތެރޭގައެވެ. މީގެ އިތުރުން، އީރާނުގެ ސުޕްރީމް ލީޑަރަކަށް ވާންޖެހޭނީ ދީނީ ގޮތުން މަތީ ފެންވަރަކަށް އުނގެނިވަޑައިގެން ހުންނެވި އިލްމުވެރިއެކެވެ.
އީރާނުގެ އޮފިޝަލުން އެމެރިކާއާއެކު އެއްވެސް މަޝްވަރާއެއް ކުރަމުންދާކަމަށް އިންކާރުކޮށްފައިވާއިރު، ޓްރަމްޕްގެ ގާތް ފަރާތްތަކުން ބުނަމުންދަނީ ވައިޓް ހައުސްއިން އީރާނަށް ”މަރާއި ހަލާކު“ ކުރިމަތިކުރަމުންދާ ކަމަށެވެ. ދެ ގައުމުގެ ދެމެދުގައި މިހާ ބޮޑު ދެކޮޅުވެރިކަމެއް އޮތްއިރު، އީރާނުގެ ލީޑަރަކު ހޮވުމުގެ ތެރެއަށް ޓްރަމްޕަށް ވަދެވޭނީ ކިހިނެއްކަމެއް ސާފެއް ނޫނެވެ.