ރާއްޖޭގެ ކުޅިވަރު އިދާރާތައް އެއް ވިއުގަޔަކުން ގުޅާލުމަށްޓަކައި ބޭނުންކުރާ ޑިޖިޓަލް ޕްލެޓްފޯމް އަޕްގްރޭޑްކޮށް ނިންމާލާފައިވާ ކަމަށް ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުﷲ ރާފިޢު ވިދާޅުވެއްޖެއެވެ.
ވަޒީރު މިކަން ހާމަކުރެއްވީ އެ ވުޒާރާގެ މަސައްކަތްތަކުގެ އެންމެ ފަހުގެ މަޢުލޫމާތު ހިއްސާކުރެއްވުމަށް އިއްޔެ ރައީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމުގައެވެ.
ނޫސްވެރިންގެ ބައްދަލުވުމުގައި ވާހަކަދައްކަވަމުން ވަޒީރު ރާފިޢު ވިދާޅުވީ، ކުޅިވަރު އެސޯސިއޭޝަންތައް ހަރުދަނާކުރުމަށްޓަކައި ކޮމިޝަނަރ އޮފް ސްޕޯޓްސްއާ އޮންނަ މުޢާމަލާތްތައް ރަނގަޅުކުރުމަކީ ނުހަނު މުހިއްމު ކަމެއް ކަމަށެވެ. އެގޮތުން ކޮމިޝަނަރ އޮފް ސްޕޯޓްސް އާއި އެސޯސިއޭޝަންތަކާއި ކްލަބް ޖަމިއްޔާތަކުގެ މެދުގައި މަޢުލޫމާތު ބަދަލުކުރެވޭނެ ހަރުދަނާ ނިޒާމެއް އޮތުމުގެ ބޭނުންތެރިކަން ވަޒީރު ފާހަގަކުރެއްވިއެވެ.
ވަޒީރު ވިދާޅުވި ގޮތުގައި މިހާރު ބޭނުންކުރަމުން އަންނަ ސޮފްޓްވެއަރ އިތުރަށް އަޕްގްރޭޑްކޮށް، އާ ޕްލެޓްފޯމަކަށް ބަދަލުކުރުމުގެ މަސައްކަތް މިހާރު ވަނީ ނިމިފައެވެ. އަދި މިހާރު ކުރިއަށްދާ ކުދިކުދި މަސައްކަތްތައް ނިންމާލުމަށްފަހު، ކުރިއަށް އޮތް ދެ ހަފްތާގެ ތެރޭގައި މި ޕްލެޓްފޯމް ރަސްމީކޮށް ބޭނުންކުރަން ފެށޭނެ ކަމަށް ވެސް ވަޒީރު ވިދާޅުވިއެވެ.
”މިކަން ކުރެވުމުން މޯލްޑިވްސް 2.0 އާ އެއް ޕްލެޓްފޯމެއްގައި އަޅުގަނޑުމެންނަށް މި މުޢާމަލާތްތައް ބޭނުންކުރެވިގެންދާނެ. މިއީ އަޅުގަނޑުމެންނަށް ލިބޭ ބޮޑު ކުރިއެރުމަކަށް ވެގެންދާނެ. ސަބަބަކީ ކްލަބް ޖަމިއްޔާތަކުން ނުވަތަ އެސޯސިއޭޝަންތަކުން ފޮނުވާ ރިކުއެސްޓްތައް ޑިޖިޓަލް ޕްލެޓްފޯމެއްގެ ތެރެއިން އަޅުގަނޑުމެންނަށް އެ މައުލޫމާތުތައް ހިއްސާކުރެވިގެންދާނެ“ ކަމަށް ވަޒީރު ވިދާޅުވިއެވެ.
މި އާ ބަދަލާއެކު ކުޅުންތެރިން ރަޖިސްޓްރީކުރުމާއި، ރިލީޒްކުރުމުގެ އިތުރުން ޤަވާއިދުތައް ހުށަހެޅުމުގެ ހުރިހާ ކަމެއްވެސް ވަންގަވް މެދުވެރިކޮށް ކުރިއަށް ގެންދެވޭނެއެވެ. މިއީ މަޢުލޫމާތުތައް ރައްކާކުރުމަށާއި މުސްތަޤުބަލުގައި ކަންކަން ފަސޭހަކުރުމަށް އެޅޭ މުހިއްމު ފިޔަވަޅެއްގެ ގޮތުގައި ވަޒީރު ސިފަކުރެއްވިއެވެ.
ނިންމާލަމުން ވަޒީރު ވިދާޅުވީ، ކުޅިވަރު އިދާރާތަކަށް ލިބިގެންދާ މި ކުރިއެރުމަކީ ސަރުކާރުގެ މޯލްޑިވްސް 2.0 ގެ ތަޞައްވުރާ އެއްގޮތަށް ގެނެވޭ މުހިއްމު ބަދަލެއް ކަމަށެވެ. މި ޕްލެޓްފޯމްގެ ސަބަބުން ކުޅިވަރުގެ ދާއިރާގެ އިދާރީ ހިންގުން އިތުރަށް ހަރުދަނާވެ، ޒަމާނީ ޑިޖިޓަލް ނިޒާމެއްގެ ތެރެއަށް ފެތިގެންދާނެއެވެ.