ޕްރެޒިޑެންޓްސް ކަޕްގެ ސެމީ ފައިނަލް ދެވަނަ މެޗުގައި 2-0 އިން ބުރު ސްޕޯޓްސް ކްލަބު ބަލިކޮށް، އޮޑިން ތާރީހީ ފުރަތަމަ ފަހަރަށް ފައިނަލުން ޖާގަ ހޯދައިފިއެވެ.
ގައުމީ ދަނޑުގައި ރޭ ކުޅުނު ސެމީ ފައިނަލް މެޗުގެ ކުރީކޮޅުން ފެށިގެންވެސް ބޮޑަށް ނުރައްކާ ކުރީ އޮޑިންނެވެ. އަހުޒަމް ރަޝީދު (އަހު)އާއި ކިއާނޫ މާޝް-ބްރައުންގެ ހަމަލާތައް ފެނުނު އިރު، އޮޑިން ދެވަނަ ހާފުގައި ލީޑު ނެގީ 51 ވަނަ މިނެޓުގައެވެ.
އަހުމަދު އައިހަމް (އައިހު) ނަގައިދިން ހުރަސް، މިސްރު ޑިފެންޑަރު، އިސްލާމް ފެކްރީ ބޮލުން ގޯލަށް ވައްދާލީ ބާރު ހަމަލާއެއް ފޮނުވާލައިގެންނެވެ.
އޭގެފަހުން ބުރުން ކުރިއަށް ޖެހުނު ނަމަވެސް، 62 ވަނަ މިނެޓުގައި އޮޑިން ލީޑު ފުޅާކޮށް، މެޗު ޔަގީންކުރިއެވެ. މެޗުގައި މޮޅަށް ކުޅުނު އަހުއަށް އޭރިއާ ތެރެއިން ލިބުނު ބޯޅަ ފަސޭހަކޮށް ގޯލަށް ނިންމާލި އިރު، އޭގެފަހުން އޭނާ ޖެހި ބޯޅައެއް ދަނޑިއަށްވެސް އަމާޒުވިއެވެ. އޭގެ އިތުރުން ބަދަލަކަށް ނުކުތް އަޔާޒް އަހުމަދު (އަޔާ) ފޮނުވާލި ބޯޅައެއްވެސް ދަނޑިއަށް އަމާޒުވިއެވެ.
ދިވެހި ޕްރިމިއާ ލީގުގެ ދެވަނައިގައިވެސް ނިންމާލި އޮޑިއަށް ރޭގެ ނަތީޖާއަކީ ތާރީހީ ނަތީޖާއެކެވެ. އެއީ މި ސީޒަނަކީ އެޓީމުން ރާއްޖޭގެ ފުރަތަމަ ޑިވިޝަނުގައި ވާދަކުރާ ފުރަތަމަ ސީޒަނަށްވުމާއެކުގައެވެ. މިއީ އޮޑިން ޕްރެޒިޑެންޓްސް ކަޕްގައި ވާދަކުރާ ފުރަތަމަ ފަހަރުވެސް މެއެވެ. އެޓީމުން ފައިނަލުގައި ނުކުންނާނީ ވަރުގަދަ މާޒިޔާ ސްޕޯޓްސް އެންޑް ރެކްރިއޭޝަނާ ދެކޮޅަށެވެ.
މާޒިޔާ ޕްރެސިޑެންޓްސް ކަޕް ފައިނަލަށް ނުކުންނާނީ މި ސީޒަނުގައި ބަލި ނުވެ އޮވެގެންނެވެ.