އިނގިރޭސި ޕްރެމިއާ ލީގުގައި ރޭ ރަށުން ބޭރުގައި އާސެނަލް އިން ދެލަނޑުގެ ލީޑެއް ހޯދާފައިވަނިކޮށް ފަހަތުން އަރައި 2-2 ގެ ނަތީޖާއަކުން މެޗު އެއްވަރުކޮށް، ލީގު ތާވަލުގެ ފުލުގައި އޮތް ވުލްވްސް އިން އާސެނަލް މޮޅުވިޔަނުދީ ހިފަހައްޓައިފިއެވެ.
މެޗުގެ ފުރަތަމަ ހާފުގައި މޮޅަށް ކުޅެ އާސެނަލް އިން މެޗު ޑޮމިނޭޓްކުރިއިރު، މެޗުގެ ފަސްވަނަ މިނެޓުގައި އެޓީމަށް ލީޑުހޯދައިދިނީ ފޯވާޑް ބަކަޔޯ ސަކާއެވެ. އަދި މީގެ އިތުރުން ވެސް މިހާފުގައި އާސެނަލް އިން ވަނީ ލަނޑު ޖަހާނެ ރަނގަޅު ގިނަ ފުރުސަތުތަކެއް ތަނަވަސްކޮށްދީފައެވެ. ނަމަވެސް ފުރަތަމަ ހާފުގެ ކުޅުން ނިމިގެންދިޔައީ ދެޓީމުންކުރެ އެއްވެސް ޓީމަކަށް އިތުރު ލަނޑެއް ކާމިޔާބު ނުކުރެވި 1-0 ގެ ނަތިޖާއަކުން އާސެނަލް ކުރީގައި އޮވެގެންނެވެ.
މެޗުގެ ދެވަނަ ހާފު ވެސް އާސެނަލް އިން ވަރުގަދަކޮށް ފެށިއިރު، މެޗުގެ 56 ވަނަ މިނެޓުގައި އެޓީމުގެ ލީޑު ފުޅާކޮށްދިނީ ޑިފެންޑަރު ޕިއޭރޯ ހިންކެޕީ އެވެ. ނަމަވެސް އޭގެ ފަސް މިނެޓް ފަހުން ވުލްވްސްގެ ޑިފެންޑަރު ހުއޭގޯ ބުއެނޯ ވަނީ ލަނޑެއް ކާމިޔާބުކޮށް އެޓީމަށް ނަތީޖާގެ ފަރަގު ކުޑަކޮށްދީފައެވެ. އަދި އެޓީމުން ނަތީޖާ އެއްވަރުކުރި ލަނޑަކީ މެޗުގެ އިތުރުވަގުތުގެ ތެރޭގައި އާސެނަލްގެ ޑިފެންޑަރު ކަލަފިޔޮރިގެ އަތުން ބައިކޮޅަށް ވަތް ލަނޑެކެވެ.
މިނަތިޖާއެކު ލީގުގައި ކުޅުނު 27 މެޗުން އާސެނަލްއަށް 58 ޕޮއިންޓް ލިބިފައިވާއިރު، އެޓީމު މިވަގުތު އޮތީ ތާވަލުގެ އެއްވަނައިގައެވެ. އަދި މިމެޗުން ހޯދި އެއްޕޮއިންޓާއެކު ލީގުގައި ކުޅުނު 27 މެޗުން ވުލްވްސްއަށް 10 ޕޮއިންޓް ލިބިފައިވާއިރު، އެޓީމު މިވަގުތު އޮތީ ތާވަލުގެ ފުލުފައެވެ.