ކުޑަކުއްޖަކަށް ޖިންސީ ގޯނާކުރި ކަމުގެ ތުހުމަތުގައި، ސްކޫލް ކުދިންނަށް އޮންލައިންކޮށް ޓިއުޝަން ނަގައިދިނުމުގެ ހިދުމަތް ދޭ ”ބްރައިޓް މައިންޑްސް“ގެ ވެރިޔާ، އަލީ އަފްލަހު ހައްޔަރުކޮށްފައިވާއިރު، އޭނާގެ މައްޗަށް ކުރެވޭ ތުހުމަތުގެ ތަފްސީލް ފުލުހުން ހާމަކޮށްފި އެވެ.
ފުލުހުން މިއަދު ބުނީ ޢަލީ އަފްލަޙުގެ މައްޗަށް ތުހުމަތު ކުރެވެނީ އިތުބާރުކުރެވޭ މަގާމެއްގައި ހުރެ، ކުޑަކުއްޖެއްގެ އުމުރުން 14 އަހަރުން ފެށިގެން 16 އަހަރާ ދެމެދު ތަކުރާރުކޮށް އެކުއްޖާއަށް ޖިންސީ ގޯނާކޮށްފައިވާކަމަށެވެ.
އެ މައްސަލައާ ގުޅިގެން އޭނާގެ ބަންދަށް 30 ދުވަސް ކޯޓުން ވަނީ ދީފައެވެ.
އޭނާ ހައްޔަރުކޮށްފައި ވަނީ މިމަހުގެ 11 ވަނަ ދުވަހުއެވެ.
އެ މައްސަލަ ފެންމަތިވުމާއެކު އޭނާ ވަނީ ރާއްޖެއިން ފިލައިގެން ގޮސްފައެވެ. އޭނާ ހައްޔަރު ކޮށްފައި ވަނީ ގިނަ ދުވަސްތަކެއް ވަންދެން ފިލައިގެން އުޅުމަށްފަހު އިންޑިއާގެ މުމްބާއީއިން ރާއްޖެ އައުމާއެކުއެވެ.