ސްޕެނިޝް ކަޕްގެ ސެމީ ފައިނަލުގެ ފުރަތަމަ ލެގުގައި ރޭ ބާސެލޯނާގެ މައްޗަށް 4-0 ގެ ތަފާތު ބޮޑު ނަތީޖާއަކުން އެތްލެޓިކޯ މެޑްރިޑް ކުރި ހޯދައިފިއެވެ.
ބާސާގެ ދަނޑުގައި ކުޅޭ ދެވަނަ ލެގުގެ މެޗު އޮންނާނީ އަންނަ މަހުގެ ތިންވަނަ ދުވަހުއެވެ. އެ މެޗު އެއްވަރުކޮށްލައިގެން ވެސް މުބާރާތުގެ ފައިނަލަށް އެތްލެޓިކޯ އަށް ދަތުރުކުރެވޭނެއެވެ.
އެތްލެޓިކޯގެ ދަނޑުގައި ކުޅުނު މި މެޗުގައި ފެނިގެންދިޔަ ހުރިހާ ގޯލެއް ވެސް ފެނިގެން ގޮސްފައިވަނީ ފުރަތަމަ ހާފުގަ އެވެ. އެގޮތުން އެތްލެޓިކޯގެ ފުރަތަމަ ގޯލަކީ މެޗުގެ ހަތްވަނަ މިނެޓްގައި ބާސާގެ ޑިފެންޑަރު އެރިކް ގާސިއާ އަތުން ބައިކޮޅަށް ވަތް ގޯލެކެވެ. އަދި މެޗުގެ 14 ވަނަ މިނެޓްގައި އެންޓޮއިން ގްރިޒްމަން އެތްލެޓިކޯގެ ދެވަނަ ގޯލު ކާމިޔާބުކޮށްދިންއިރު، އެޓީމުގެ ތިންވަނަ ގޯލު މެޗުގެ 33 ވަނަ މިނެޓްގައި ކާމިޔާބުކޮށްދީފައިވަނީ އަޑެމޯލާ ލުކްމަން އެވެ.
އަދި ފުރަތަމަ ހާފް ނިމުމުގެ ކުރިން ޖޫލިއަން އަލްވަރޭޒް އެތްލެޓިކޯގެ ހަތަރުވަނަ ގޯލު ކާމިޔާބުކޮށްދިންއިރު، ދެވަނަ ހާފުގައި ގޯލުޖަހާނެ އިތުރު ފުރުސަތުތަކެއް ވެސް އެތްލެޓިކޯ އިން ތަނަވަސްކޮށްފައިވެއެވެ.
މި މެޗުގެ 85 ވަނަ މިނެޓްގައި އެތްލެޓިކޯގެ ކުޅުންތެރިއަކަށް ކުރި ފައުލަކާ ގުޅިގެން ބާސާގެ ޑިފެންޑަރު އެރިކް ގާސިއާއަށް ދެއްކި ރަތްކާޑާއެކު އެޓީމުން މެޗު ނިންމާލީ 10 ކުޅުންތެރިންނާއެކުއެވެ.