ލޯކަލް ކައުންސިލްތަކާއި އަންހެނުންގެ ތަރައްޤީއަށް މަސައްކަތްކުރާ ކޮމެޓީތަކުގެ އިންތިޚާބަށް ކެންޑިޑޭޓުންގެ ނަންތައް ތަރުތީބު ކުރުމަށް ގުރުއަތު ނަގަން ފަށައިފިއެވެ.
ގުރުއަތު ނަގަން ފެށީ ހެނދުނު 10:00 ގައެވެ. މިކަން ރާއްޖޭގެ ހުރިހާ ރަށެއްގައި ވެސް ދިޔަ ކަމަށް އިލެކްޝަން ކޮމިޝަނުން ބުންޏެވެ
މާލޭގައި ގުރުއަތު ނެގުން ކުރިއަށް ގެންދަނީ އިންތިޚާބާ ބެހޭ މަރުކަޒުގައެވެ. އެއީ މާފަންނުގައި، ކުރީގެ ޑްރަގް ކޯޓު ހިންގި އިމާރާތެވެ. ސިޓީތަކާއި އެހެނިހެން ރަށްތަކުގައި ގުރުއަތު ނެގުން ކުރިއަށް ދަނީ ކައުންސިލް އިދާރާގައި ނުވަތަ އެރަށެއްގެ ކައުންސިލުން ކަނޑައަޅާފައިވާ ތަންތަނުގައެވެ.
އޭޕްރީލް 4 ގައި ބާއްވަން ހަމަޖެހިފައިވާ ލޯކަލް ކައުންސިލް އިންތިޚާބާއި އަންހެނުންގެ ތަރައްގީއަށް މަސައްކަތް ކުރާ ކޮމިޓީގެ އިންތިޚާބުގައި 2،994 ކެންޑިޑޭޓުން ވާދަކުރަން ހުށައަޅާފައިވެ އެވެ. އަދި ނަން ތަރުތީބުކޮށް ކެންޑިޑޭޓުންގެ ދާއިމީ ލިސްޓް އީސީން އަންނަ ހޮނިހިރު ދުވަހު ރަސްމީކޮށް އާންމު ކުރާނެ އެވެ.
މިފަހަރުގެ އިންތިޚާބުގައި ހަ ސިޔާސީ ޕާޓީއަކުން ވާދަކުރެ އެވެ. ސިޔާސީ ޕާޓީތަކުން 1،210 ކެންޑިޑޭޓުން ވާދަކުރާއިރު އަމިއްލަ ގޮތުން 401 ކެންޑިޑޭޓުން ވާދަކުރެ އެވެ.
މި އިންތިޚާބުގައި ރަށު ކައުންސިލްތަކަށް 626 އަދި ސިޓީ ކައުންސިލްތަކަށް 52 ކައުންސިލަރުން އިންތިޚާބު ކުރާނެއެވެ. އަދި އަންހެނުންގެ ކޮމިޓީތަކަށްވެ ސް އެ އަދަދަށް މެންބަރުން އިންތިޚާބު ކުރާނެ އެވެ.
އިންތިޚާބުގައި 294،937 މީހުންނަށް ވޯޓުލުމުގެ ޙައްގު ލިބިގެންވެ އެވެ.