ސަރުކާރުގެ އައިނު ފިހާރަ އައްޑޫގައި ހުޅުވައިފިއެވެ.
އައްޑޫ އިކްއެޓޯރިއަލް ހޮސްޕިޓަލް (އޭއީއެޗް) ގައި އެތަން ހުޅުވީ ”އައިޖީއެމްއެޗް އޮބްޓިކަލްސް އައްޑޫ“ ގެ ނަމުގައެވެ. މިއަދު ހަވީރު ބޭއްވި ރަސްމިއްޔާތެއްގައި އައިނު ފިހާރަ ހުޅުއްވައި ދެއްވީ ހެލްތު މިނިސްޓަރު އަބްދުﷲ ނާޒިމެވެ.
އެ ރަސްމިއްޔާތުގައި (އޭއީއެޗް) ގެ ސީއީއޯ ޑރ. އިބްރާހީމް ޔާސީރު ވެސް ބައިވެރިވެވަޑައިގަތެވެ.
އައްޑޫގައި ހުޅުވި މި އައިނު ފިހާރަ އަކީ ރައްޔިތުންނަށް ލުއި ފަސޭހަކޮށް ނަންބަރު އައިނު ހެއްދޭނެ ފުރުސަތު ފަހިކޮށް ދިނުމުގެ ގޮތުން ސަރުކާރުން ހުޅުވި ތިން ވަނަ އައިނު ފިހާރަ އެވެ. އަދި އަތޮޅު ތެރޭގައި ހުޅުވި ފުރަތަމަ އައިނު ފިހާރަ އެވެ.
މާލެ ސިޓީ ގްރޫޕް އޮފް ހޮސްޕިޓަލްސް (އެމްސީޖިީއެޗް) އިން ންމެ ފުރަތަމަ އައިނު ހުޅުވީ އައިޖީއެމްއެޗްގަ އެވެ. އެއީ މިދިޔަ އަހަރުގެ ޖުލައި 27 ގަ އެވެ. އަދި ދެވަނަ އައިނު ފިހާރަ ހުޅުމާލޭ ހޮސްޕިޓަލްގައި ހުޅުވީ އޮގަސްޓް 27 ގަ އެވެ.
ރާއްޖޭގެ 5 ރީޖަނަލް ހޮސްޕިޓަލުގައި އައިނު ހެއްދުމުގެ ޚިދުމަތް ދޭން ސަރުކާކރުން އޮތީ ނިންމައިފަ އެވެ.