ރަށްރަށުގައި މިހާރު ފަށާފައިވާ ތަރައްގީގެ މަޝްރޫއުތައް ކާމިޔާބުކަމާއެކު ނިންމުމަށްޓަކައި ލޯކަލް ކައުންސިލްތަކުގެ އެއްބާރުލުމާއި އެހީތެރިކަން ސަރުކާރަށް ވަރަށް ބޮޑަށް ބޭނުންވާ ކަމަށް ޕީއެންސީގެ ޕާލަމެންޓްރީ ގުރޫޕުގެ ލީޑަރު އިބްރާހިމް ފަލާހު ވިދާޅުވެއްޖެއެވެ.
ލޯކަލް ކައުންސިލްތަކުގެ އިންތިހާބުގައި ހދ. ކުޅުދުއްފުށިން ވާދަކުރާ ޕީއެންސީގެ ކެންޑިޑޭޓުންގެ ކެމްޕެއިން އިފުތިތާހު ކުރުމަށް އެ ސިޓީގައި ބޭއްވި ޚާއްސަ ޖަލްސާގައި ވާހަކަފުޅުދައްކަވަމުން ފަލާހް ވިދާޅުވީ، ކުރިއަށް އޮތް އޭޕްރީލް ހަތަރު ވަނަ ދުވަހު ވޯޓުކަރުދާހުގައި ޖަހާ ފާހަގައަކީ ރަށްރަށާއި ސިޓީތަކުގެ ކުރިމަގު ބައްޓަންކުރާނެ ގޮތް ނިންމާނެ ފާހަގައެއް ކަމަށެވެ.
ފަލާހް ވިދާޅުވީ ”އެ ދުވަހު ނިންމާނެ ތިޔަބޭފުޅުންގެ ދަރިންނާއި ރަށާއި ސިޓީ އާއި ގައުމަށްޓަކައި ކުރިއަށް ދާން، ކުރިއަރަން ރަނގަޅު ގޮތް ބޭނުންވާ ބައެއްތޯ ނުވަތަ އޮތް ގޮތަށް ސިޓީތަކުގެ ތަރައްގީ ބާއްވަން ބޭނުންވާނެ ބައެއްތޯ،“ ކަމަށެވެ. މީގެ އިތުރުން އާ ގާނޫނުއަސާސީ އަށް 2008 ވަނަ އަހަރު އަމަލުކުރަން ފެށި ފަހުން ކުޅުއްފުށި ސިޓީ ކައުންސިލްގެ އަޣުލަބިއްޔަތު އެމްޑީޕީ ނޫން ބަޔަކަށް ދީފައި ނުވާކަން ފާހަގަކުރައްވައި، މިއީ އެ ވިސްނުން ބަދަލުކުރަންވީ ވަގުތު ކަމަށް އޭނާ ވިދާޅުވިއެވެ.
މި އިންތިހާބު 80 ޕަސެންޓަށް ވުރެ މަތީ ނަތީޖާއަކުން ޕީއެންސީން ކާމިޔާބު ކުރާނެ ކަމުގެ ޔަގީންކަން ފަލާހް ވަނީ ދެއްވާފައެވެ. އޭނާ ވިދާޅުވި ގޮތުގައި އެއީ ރައީސުލްޖުމްހޫރިއްޔާ ޑރ. މުހައްމަދު މުއިއްޒަކީ ރައްޔިތުންނަށް ވެވަޑައިގަންނަވާ ވައުދުތައް ފުއްދަވާ ވެރިއެއް ކަމަށް ރައްޔިތުން ގަބޫލުކުރާތީއެވެ.
މި ޖަލްސާގައި ފަލާހް ވަނީ ކުޅުދުއްފުށީގެ ތަރައްގީއަށްޓަކައި ސަރުކާރާ ގުޅިގެން މަސައްކަތް ކުރާނެ ކައުންސިލެއް އިންތިހާބު ކުރުމުގެ މުހިންމުކަމުގެ މައްޗަށް އަލިއަޅުވާލައްވާފައެވެ.