ދިވެހި ވަތަނީ ހިދުމަތް ނުވަތަ ރާއްޖޭގެ ނެޝަނަލް ސާވިސްގެ ފުރަތަމަ ބުރު ފުރިހަމަ ކުރި ބައިވެރިންގެ ތެރެއިން އެ ހިދުމަތުގެ ފަންނީ ތަމްރީނުތަކުން ޖާގަ ނުލިބުނު 240 ކުއްޖަކަށް، އެކުދިން ބޭނުންވި ދާއިރާތަކުން އެހެން ވަޒީފާތައް ހަމަޖައްސާދީފައިވާ ކަމަށް ރައީސް ޑރ. މުހައްމަދު މުއިއްޒު މިއަދު ވިދާޅުވެއްޖެ އެވެ.
ސްކޫލް ދައުރުގައި ރަނގަޅު ނަތީޖާ ނުނެރެވޭ ޒުވާނުންނަށް ފުރުސަތެއް ދިނުމުގެ އިތުރުން ސަލާމަތީ ބާރުތައް ކުރިއެރުމަށް ކޮންމެ އަހަރަކު ސިފައިންގެ 1،000 މީހުން ރެކްރޫޓް ކުރުމުގެ ގޮތުން ސަރުކާރުން ކުރިއަށްގެންދާ ’ދިވެހި ވަތަނީ ހިދުމަތު’ގެ ޕްރޮގްރާމަށް ކުރިމަތިލާން ހުޅުވާލީ މިދިޔަ އަހަރުގެ މޭ މަސްތެެރޭގަ އެވެ.
ވަތަނީ ހިދުމަތުގެ ތަމްރީނުގައި 350 ދަރިވަރުން ބައިވެރިވިޔަސް ޕްރޮގްރާމު ފުރިހަމަކޮށް ދަސްވެނިވީ 344 ދަރިވަރުންނެވެ. އޭގެތެރެއިން ފަންނީ ތަމްރީނުތަކަށް ހޮވިފައިވަނީ 65 ކުއްޖެކެވެ. އޭގެތެރޭގައި ހިމެނެނީ، އުމުރުން 16 އަހަރާއި 19 އަހަރާ ދެމެދުގެ ޒުވާނުންނެވެ.
ރިޔާސީ ބަޔާން އިއްވަވަމުން ރައީސް ވިދާޅުވީ އެ ހިދުމަތުގެ ފަންނީ ތަމްރީނުތައް، ބ. ކިހާދޫ ޓެކްނިކަލް އެންޑް ވޮކޭޝަނަލް ސެންޓަރުގައި މިދިޔަ މަހުގެ 15ގައި ފަށާފައިވާ ކަމަށެވެ. އެތަނުގައި އެ ތަމްރީނު ފުރިހަމަ ކުރަނީ އެކަމަށް ހޮވުނު 65 ކުއްޖެކެވެ.
ދަސްވެނިވި ކުދިންގެ ތެރެއިން އެ ތަމްރީންތަކަށް ނުހޮވޭ 278 ކުދިން ހިމެނެ އެވެ. އޭގެ ތެެރެއިން 240 ކުއްޖަކަށް، އެ ކުދިން ވަޒީފާ އަދާކުރަން ޝައުގުވެރިކަން ފާޅުކުރި ތަންތަނުން ވަޒީފާތައް ހަމަޖައްސަދީފައިވާ ކަމަށް ރައީސް ވިދާޅުވިއެވެ.
ބާކީ 38 ކުއްޖަކު ބޭނުންވީ، ޕްރައިވެޓް ސެކްޓާގައި ވަޒީފާ އަދާކުރަން ކަމަށްވާތީ، އެ ފުރުސަތުދިނުމަށް ދޫކޮށްލާފައިވާނެ ކަމަށް ވެސް ރައީސް ވިދާޅުވި އެވެ.
ރައީސް ވިދާޅުވީ އޭގެތެރެއިން 171 ކުދިން އެމްއެންޑީއެފްގެ ވަޒީފާއަށް، 7 ކުދިން އެމްޑީއެފްގެ ފަޔާމަނުންގެ ވަޒީފާއަށް 32 ކުދިން އޭވިއޭޝަން އެންޑް ޕޯޓްސް ސެކިއުރިޓީ ކޮމާންޑުގެ ވަޒީފާއަށް، 23 ކުދިން ފުލުހުންގެ ވަޒީފާއަށް 5 ކުދިން އިމިގްރޭޝަންގެ ވަޒީފާއަށް 3 ކުދިން އެމްއޭސީއެލްގެ ވަޒީފާ ހަމަޖައްސާފައިވާ ކަމަށެވެ.
މި ހިދުމަތުގެ ދެވަނަ ބެޗުގެ ތަމްރީނުތައް 350 ބައިވެރިއަކު މިހާރު ފުރިހަމަކުރަމުންދާ ކަމަށް ވެސް ރައީސް ވިދާޅުވި އެވެ. ސަރުކާރުގެ އަމާޒަކީ، މިއަހަރުތެރޭ އިތުރު 1000 ޒުވާނުންނަށް އެ ހިދުމަތުގެ ތަމްރީނުތައް ދިނުން ކަމަށް ވިދާޅުވި އެވެ.