ގޯލްޑަން ފުޓްސަލް ޗެލެންޖް 2025ގައި ޒޯން 2 ގެ ފަހު މެޗުގައި މިރޭ ނ. މާޅެންދޫއާއި ރ. ދުވާފަރު ބައްދަލުކުރި މެޗު 2-1 ގެ ނަތީޖާއަކުން ދުވާފަރު ކާމިޔާބުކޮށްފިއެވެ.
މެޗުގެ ފުރަތަމަ ހާފުގައި ގިނަވަގުތު ބޯޅަ ހިފަހައްޓައިގެން މޮޅަށް ކުޅެ ދުވާފަރުން މެޗު ޑޮމިނޭޓުކުރި އިރު، އެޓީމުގެ ފުރަތަމަ ގޯލް ކާމިޔާބުކޮށްދިނީ މުހައްމަދު އިސާމްއެވެ. މިމެޗުގައި މާޅެންދޫއިން ނަތީޖާ ހަމަހަމަ ކުރި ގޯލް ކާމިޔާބުކޮށްދިނީ އެޓީމުގެ އަލީ ފާރިސްއެވެ.
މެޗުގެ ދެވަނަ ހާފުގައި ދުވާފަރަށް އަނެއްކާވެސް ލީޑްނަގައި ދިނީ އެޓީމުގެ އަބްދުﷲ ލޫތް އިބްރާހިމް އެވެ. މިމެޗުގެ މޮޅު ކުޅުންތެރިއަކަށް ހޮވުނީ ދުވާފަރު ޓީމުގެ މުހައްމަދު އިސާމްއެވެ.
މިޒޯންގެ ދެވަނަ މެޗުގައި ށ. ކަނޑިތީމުއާއި ށ. ފޯކައިދޫ ބައްދަލުކުރި މެޗު ކާމިޔާބު ކުރީ ށ. ކަނޑިތީމެވެ. މި ނަތީޖާއާއި އެކު ޒޯން 2 ގެ ފައިނަލުގައި ވާދަކުރާ ދެޓީމުވަނީ ކަށްވަރުވެފައެވެ. ފެބްރުއަރީ 2 ވާ ހޯމަ ދުވަހުރޭ ޒޯން ފައިނަލުގައި ބައްދަލުކުރާނީ ދުވާފަރު އަދި ކަނޑިތީމެވެ. މި ދެޓީމުވެސް ވަނީ މި މުބާރާތުގެ ގަދަ 16އަށް ދަތުރުކޮށްފައެވެ.