ރައީސް ޑރ. މުހައްމަދު މުއިއްޒުގެ ރިޔާސީ ވައުދާއެއްގޮތަށް ގިރާވަރުފަޅު ހިއްކުމުގެ އަމަލީ މަސައްކަތް މިއަދު ހެނދުނު ފަށައިފިއެވެ.
ރައީސް ވަނީ ގިރާވަރުފަޅުގެ މަސައްކަތް ކުރިއަށްދާ ފޮޓޯ އާއި ވީޑިއޯ ސޯޝަލް މީޑިއާގައި ހިއްސާކުރައްވާފައެވެ.
ގިރާވަރުފަޅަކީ މިދިޔަ ސަރުކާރުން މާލޭގެ ރައްޔިތުންނަށް ގޯތި ދީފައިވާ ތަނެކެވެ. އެ ފަޅު ހިއްކައި ހައްގުވެރީންނަށް ގޯތިތައް ހަވާލުކޮށްދިނުމަކީ ރައީސް މުއިއްޒުގެ ރިޔާސީ ވައުދެކެވެ.
ގިރާވަރުފަޅުން ގޯތި ދީފައި ވަނީ ތޮއްޖެހޭގޮތަށް ކަމުން އޭގެތެރެއިން ބައެއް ގޯތިތައް މި ސަރުކާރުން ވަނީ ގުޅިފަޅަށް ބަދަލުކޮށްފައެވެ. އަދި ގިރާވަރުފަޅުގެ ލޭންޑް ޔޫސް ޕްލޭން މުރާޖައާކޮށް އަލުން ވަނީ ނެރެފަ އެވެ. އާ ލޭންޑް ޔޫސް ޕްލޭނާ އެއްގޮތަށް ގޯތި ލިބުނު މީހުންގެ މެދުގައި ގުރުއަތު ނެގުން މާދަމާ އޮންނާނެއެވެ.
ގިރާވަރުފަޅު ހިއްކުމަށް ބޭނުންކުރަނީ ރާއްޖެއަށް ގެނެސްފައިވާ ބޮޑެތި ޑްރެޖަރުތަކުގެ ތެރެއިން ޓްރެއިލިން ސަކްޝަން ހޮޕަރ ޑްރެޖަރ އޮރަންޖީ ބޭނުންކޮށްގެންނެވެ. މިއީ 22،000 ކިއުބިކް މީޓަރުގެ ނެގުމުގެ ގާބިލުކަން ލިބިފައިވާ ބޮޑު ޑްރެޖަރެކެވެ.
ސަރުކާރުގެ އަމާޒަކީ ކުރިއަށް އޮތް ދެ މަސް ދުވަހުގެ ތެރޭގައި ގިރާވަރުފަޅު ހިއްކައި ނިންމުމެވެ.