ނ. ވެލިދޫގައި ސީއެމްބިއުލާންސްގެ ހިދުމަތް މިއަދު ފަށައިފިއެވެ.
ސީއެމްބިއުލާންސްގެ ހިދުމަތް އެ ރަށުގައި ގާއިމްކުރުމަކީ މިިދިޔަ ޖުލައި މަހުގެ ތެރޭގައި ރައީސް ޑރ. މުހައްމަދު މުއިއްޒު، އެ ރަށަށް ކުރެއްވި ދަތުރުފުޅުގައި ވެވަޑައިގަތް ވައުދެކެވެ.
މިއަދު ބޭއްވި ރަސްމިއްޔާތެއްގައި ސީއެމްބިއުލާންސްގެ ހިދުމަތް ވެލިދޫގައި ފައްޓަވައިދެއްވީ ޑިފެންސް މިނިސްޓްރީގެ ޑެޕިއުޓީ މިނިސްޓަރު ފާތިމަތު މިޒްނާ އަލީ އެވެ.
އެ ރަސްމިއްޔާތުގައި މިޒްނާ ވިދާޅުވީ އެ ހިދުމަތް މި މަހުގެ ތެރޭގައި ތައާރަފުވެގެން ދިއުމަކީ ރައީސް ޑރ. މުހައްމަދު މުއިއްޒަކީ ނަތީޖާ ނެރެދެއްވާ ރައީސެއްކަން ދޭހަވާ ކަމެއް ކަމަށެވެ.
”މިއަދު މި ފެންނަނީ ރައީސް ޑރ. މުއިއްޒަކީ ވިދާޅުވާ ބަސްފުޅު، އެގޮތަށް ކޮށްދެއްވާ ނަތީޖާ ދައްކަވައި އަދި ވެވަޑައިގަންނަވާ ވައުދުފުޅުތައް އަކުރުން އަކުރަށް ފުއްދަވާކަމުގެ އުފާވެރި ހެކިތައް،“ އޭނާ ވިދާޅުވި އެވެ.
އޭނާ ވިދާޅުވީ މި ސަރުކާރުގެ އެންމެ ބޮޑު އަމާޒަކީ ”މޯލްޑިވްސް ފަސްޓް“ ޕޮލިސީގެ ދަށުން ދިވެހި ރައްޔިތުންގެ ފުރާނަ އާއި ސަލާމަތާ ގުޅިފައިވާ ކަންކަމުގައި ދިވެހިންގެ އަމިއްލަ ބާރުވެރިކަން އިސްކުރުން ކަމަށެވެ.
މިހާތަނަށް ނ. އަތޮޅުގައި ސީއެމްބިއުލާންސްގެ ހިދުމަތް ގާއިމްކޮށްފައި ވަނީ އެ އަތޮޅު މަނަދޫގައެވެ. ނަމަވެސް ވެލިދުއަކީ އެރަށާ ވަރަށް ދުރުގައި އޮންނަ ރަށަކަށްވުމުން ބަލި މީހުން އުފުލުމުގައި ވަރަށް ގިނަ ވަގުތު ހޭދަވެއެވެ. މިކަމަށް ދާއިމީ ހައްލެއް ގެނެސްދެއްވުމަކީ ރައީސް މުއިއްޒުގެ ވައުދެކެވެ.
މިޒްނާ ވިދާޅުވީ މި އަހަރުގެ ތެރޭގައި ސަރުކާރުން އިތުރު 9 ސީ އެމްބިއުލާންސް ހޯދާނެ ކަމަށެވެ. އަދި އޭގެ ތެރެއިން ސީއެމްބިއުލާންސް ބޭނުންކުރާނީ މިހާރު އެ ހިދުމަތް މެދުކެނޑިފައިވާ ތިން ރަށުގައި ކަމަށް ވިދާޅުވިއެވެ.