އެންމެ އިންސާފުވެރިގޮތަކީ އަމިއްލަ އެއްވެސް ބޯހިޔާވަހިކަމެއް ނެތް މީހުންނަށް ސޯޝަލް ހައުސިންގެ ފްލެޓްތައް ދިނުން ކަމަށް ހައުސިން މިނިސްޓަރު ޑރ. އަބްދުﷲ މުއްތަލިބު ވިދާޅުވެއްޖެއެވެ.
ސޯޝަލް މީޑިއާގައި މިނިސްޓަރު މުއްތަލިބު ވިދާޅުވީ ސަރުކާރުން ދޭ ބޯހިޔާވަހިކަމަކީ އާމްދަނީ ހޯދަން އޮންނަ އެއްޗަކަށް ވެގެންނުވާނެ ކަމަށެވެ.
”ސަރުކާރުގެ ބޯހިޔާވަހިކަމުގެ ސިޔާސަތު އޮންނަނީ އެންމެ ސަބަބަކަށްޓަކައި. އެއީ އެއްވެސް އާއިލާއެއް ކަރާމާތްތެރި އަދި ހަމަޖެހޭ ދިރިއުޅުމެއް އުޅުމަށް ބޭނުންވާ އަސާސީ ބިނާއަކުން މަހްރޫމް ނުވާނެކަން ކަށަވަރުކުރުމަށް. ބޯހިޔާވަހިކަމަކީ އިތުރުކުރަން އޮންނަ “ބޯނަސް” އެއް ނޫން،“ މުއްތަލިބު ވިދާޅުވިއެވެ.
އާއިލީ ބޯހިޔާވަހިކަމުގެ ދަށުން ދަށުން ގޯއްޗާއި ފްލެޓް ދޫކުރާއިރު، މާލެ ސަރަހައްދުގައި ދެމަފިރިން ކުރެ އެކަކުގެ ނަމުގައި ބޯހިޔާވަހިކަމެއް އޮތް ނަމަ ޝަރުތު ހަމަނުވާނެއެވެ.
ދެމަފިރިން ކުރެ އެކަކުގެ ނަމުގައި ބޯހިޔާވަހިކަމެއް އޮތް ނަމަ ޝަރުތު ހަމަނުވާނެ ކަމަށް ކަނޑައެޅީ މި ޕްރޮގްރާމަކީ އެއްވެސް ބޯހިޔާވަހިކަމެއް ނެތް އާއިލާތަކަށް އަޅައިދޭ ބިންގަލަކަށްވާތީ ކަމަށް މުއްތަލިބު ވިދާޅުވިއެވެ.
”އެހެން ގޮތެއް (ފޯލްބެކް އޮޕްޝަން) ނެތުން، ދިގުމުއްދަތުގެ ރައްކާތެރިކަމެއް ނެތުން، އަގުތައް އުފުލުމާއި ނުވަތަ ބޯހިޔާވަހިކަން ގެއްލުމުގެ ބިރުން ސަލާމަތްވާނެ “އައްޑަނައެއް” ނެތުން.“ އަނބިމީހާ ނުވަތަ ފިރިމީހާގެ ނަމުގައި ގެދޮރެއް ނުވަތަ ބިމެއް އޮތް އާއިލާއަކަށް، އެތަނުގެ ކުޑަބޮޑުމިނަށް ބެލުމެއް ނެތި، ކޮންމެވެސް މިންވަރެއްގެ ރައްކާތެރިކަމެއް އޮވޭ، ވަސީލަތްތައް މަދު ހާލަތެއްގައި، އިސްކަންދޭނެ ތަރުތީބެއް ކަނޑައެޅުމަކީ ތަފާތުކުރުމެއް ނޫން،” މިނިސްޓަރު ވިދާޅުވިއެވެ.
މި ސަރުކާރުން އަޅާ ފްލެޓްތަކަށް މި ދައުރު ނިމުމުގެ ކުރިން ވަދެވޭނެ ކަމުގެ ޔަގީންކަން މިނިސްޓަރު މުއްތަލިބު ވަނީ ދެއްވާފައެވެ.