ރާއްޖޭގައި ބާއްވާ އެންމެ ބޮޑު ފުޓްސަލް މުބާރާތުގެ މި ފަހަރުގެ އެޑިޝަން، ހިއުންޑާއި ގޯލްޑަން ފުޓްސަލް ޗެލެންޖުގެ ރ. އަތޮޅުގެ ޗެމްޕިއަންކަން ދުވާފަރުން ހޯދައިފިއެވެ.
މިއަދު ހަވީރު ކުޅެވުނު ރ. އަތޮޅު ފައިނަލު މެޗު ދުވާފަރުން ކާމިޔާބުކުރީ ވާދަވެރި އިނގުރައިދޫ 2-0 ގެ ނަތީޖާއަކުން ބަލިކޮށްގެންނެވެ.
މި މެޗުގައި ދުވާފަރުން ޖެހި ދެ ގޯލުވެސް ކާމިޔާބުކޮށްދިނީ ފައިނަލް މެޗުގެ މޮޅު ކުޅުންތެރިއަކަށް ހޮވުނު ދުވާފަރުގެ ހަސަން އަޒޫމް އަލީއެވެ.
ފައިނަލް މެޗަށްފަހު ވަނީ އަތޮޅުބުރުގެ މަގާމުތަކާއި ޗެމްޕިއަން ޓްރޮފީ ހަވާލުކުރުމުގެ ރަސްމިޔާތު ބާއްވާފައެވެ. އެގޮތުން ރ. އަތޮޅުގެ މޮޅު ކުޅުންތެރިޔާގެ މަގާމާއި އެންމެ ގިނަ ގޯލު ޖެހި ކުޅުންތެރިޔާގެ މަގާމު ހޯދީ ދުވާފަރު ޓީމުގެ ހުނަރުވެރި ކުޅުންތެރިޔާ މުހައްމަދު އިސާމްއެވެ.