ދިވެހިރާއްޖެއާއި ސިންގަޕޫރުގެ ދެމެދުގައި ރަސްމީ ގުޅުން ގާއިމްކުރެވުނުތާ 50 އަހަރުފުރުމުގެ މުނާސަބަތުގައި ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ތަހުނިޔާ ވިދާޅުވެއްޖެ.
މިއަދު އެސްގައި ކުރެއްވި ޕޯސްޓެއްގައި ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ވަނީ ދެޤައުމުގެ ގުޅުން ގާއިމްކުރެވުނުތާ 50 އަހަރު ފުރުމުގެ މުނާސަބަތުގައި އެގައުމުގެ ބޮޑުވަޒީރަށާއި ރައީސްއަށް އަދި އެޤައުމުގެ ރައްޔިތުންނަށް ތަހުނިޔާ ވިދާޅުވެފައެވެ. އަދި މީގެ އިތުރުން ވޭތުވެ ދިޔަ އަހަރުތަކުގައި ދެޤައުމުގެ ދެމެދުގައި މުހިންމު ވިޔަފާރީގެ ގުޅުންތަކާއި ރަސްމީ ގުޅުންތައް ޤާއިމް ވެފައިވާކަމަށްވަނި ފާހަގަ ކުރައްވާފައެވެ. އެހެންކަމުން ކުރިޔަށް އޮތް ދުވަސްތަކުގައި މިގުޅުންތައް އިތުރަށް ފުޅާވެގެން ދިއުމަށް އެދޭކަންވެސް ވަނީ ހިއްސާ ކުރައްވާފައެވެ.
”ވޭތުވެދިޔަ 50 އަހަރުގެ ތެރޭގައި އަޅުގަނޑުމެންގެ ވިޔަފާރީގެ ގުޅުންތަކާއި، ރައްޔިތުންގެ މެދުގައި އޮންނަ ގުޅުންތަކާއި އަދި ރަސްމީ ބައްދަލުވުންތައް ވަނީ އިތުރުވެފައި. ކުރިމަގުގައި މިގުޅުން ދެމެހެއްޓެނިވި ގޮތެއްގައި ކުރިޔަށްގެންދިޔުމަށް އަޅުގަނޑުމެންގެ އެއްބާރުލުން އިތުރު ކުރެވޭނެކަމަށް އަޅުގަނޑު އުއްމީދުކުރަން.“ ރައީސުލްޖުމްހޫރިއްޔާ ވިދާޅުވިއެވެ.
ދިވެހިރާއްޖެއާއި ސިންގަޕޫރުގެ ދެމެދުގައި ރަސްމީ ގުޅުން ގާއިމްކުރެވުނީ 1975 ވަނަ އަހަރުގެ ފެބްރުއަރީ 20 ވަނަ ދުވަހުއެވެ. ދެ ޤައުމުގެ ދެމެދުގައި ވަރުގަދަ ޑިޕްލޮމެޓިކް ގުޅުމެއް ވޭތިވުވެދިޔަ އަހަރުތަކުގައި ދަމަހައްޓަމުން އައިސްފައިވެއެވެ. 2007 ވަނަ އަހަރުގެ ނޮވެމްބަރު 29 ވަނަ ދުވަހު ދިވެހިރާއްޖެއިން ސިންގަޕޫރުގައި ހައި ކޮމިޝަނެއް ހުޅުވާފައިވެއެވެ. މިކަމުން ދެ ޤައުމުގެ ދެމެދުގައިވާ ގުޅުމުގެ މުހިންމުކަން ފާހަގަކޮށްދެއެވެ.
އަހަރުތަކެއް ވަންދެން، ދެ ޤައުމުގެ ދެމެދުގައި އެއްބާރުލުން އިތުރުކުރުމަށްޓަކައި މަތީ ފެންވަރުގެ ބައްދަލުވުންތައް ބާއްވާފައިވެއެވެ. ރަސްމީ ބައްދަލުވުންތަކުގެ އިތުރުން، ގިނަ އަދަދެއްގެ ނުރަސްމީ ޒިޔާރަތްތައްވެސް އެޤައުމަށް ކުރެވިފައިވެއެވެ.
ދިވެހިރާއްޖެއިން ސިންގަޕޫރުގައި ހައި ކޮމިޝަނެއް ހުރިނަމަވެސް ސިންގަޕޫރުން ދިވެހިރާއްޖޭގައި ދާއިމީ ޑިޕްލޮމެޓިކް މިޝަނެއް އަދި ނުބަހައްޓައެވެ.
މިދުވަހުގެ މުނާސަބަތުގައި ދިވެހިރާއްޖޭގެ ރައީސުލްޖުމްހޫރިއްޔާގެ ނައިބުވެސް ވަނީ ތަހުނިޔާ ދަންނަވައި އެކްސްގައި ޕޯޓެއް ކުރައްވާފައެވެ.