އަމިއްލައަށް ހަދާފައިވާ ފޮޓޯއެއް ހިއްސާކޮށް، ވެނެޒުއޭލާގެ ވަގުތީ ރައީސަކީ އޭނާކަން، އެމެރިކާގެ ރައީސް ޑޮނަލްޑް ޓްރަމްޕް އިއުލާންކޮށްފިއެވެ.
ޓްރަމްޕް އޭނާގެ މީސް މީޑިއާ އެޕް ޓްރޫތުގައި ޕޯސްޓްކުރި ފޮޓޯއެއްގައި އޭނާ އަކީ ވެނެޒުއޭލާގެ އެކްޓިން ރައީސް ކަމަށް ޖަހާފައި ވެއެވެ.
މި މަހުގެ ތިން ވަނަ ދުވަހު އެމެރިކާއިން ވެނެޒުއޭލާއަށް ވަރުގަަދަ ހަމަލާތަކެއްދީ، އެ ގައުމުގެ ރައީސް ނިކޮލަސް މަޑޫރޯ އާއި އެމަނިކުފާނުގެ އަނބިކަނބަލުން ސިލިއާ ފްލޯރެސް ވަނީ ހައްޔަރުކޮށްފައެވެ. މިކަމާއި ގުޅިގެން އެތައް ގައުމަކުން ދަނީ އެމެރިކާއަށް ފާޑުކިޔަމުންނެވެ.
މަޑޫރޯގެ ހައްޔަރަށް ފަހު، ވެނެޒުއޭލާގެ އިންތިގާލީ ލީޑާޝިޕް މިހާރު ވަނީ ގާއިމްކޮށްފައެވެ. މި ލީޑާޝިޕް ގާއިމްކޮށްފައި ވަނީ ވެނެޒުއޭލާގެ ސުޕްރީމް ޓްރައިބިއުނަލް އޮފް ޖަސްޓިސް އާއި ދުސްތޫރީ ވާރުތަ މަރުހަލާގެ ތެރެއިންނެވެ. އެގޮތުން ވެނެޒުއޭލާގެ ސުޕްރީމް ޓްރައިބިއުނަލް އޮފް ޖަސްޓިސް އިން ވަނީ މަޑޫރޯ ހައްޔަރު ކުރުމާއި ގުޅިގެން ވަގުތީ ރައީސްގެ މަގާމު އަދާ ކުރުމަށް ނައިބު ރައީސް ޑެލްސީ ރޮޑްރިގޭޒްގެ މައްޗަށް އަމުރު ކުރައްވާފައެވެ.
އޭގެ ފަހުން މިއަދު އެޑިޓްކޮށްފައިވާ ވިކިޕީޑިއާގެ ރަސްމީ ޕޭޖުގެ ފޮޓޯއެއް ޓްރޫތްގައި ޓްރަމަޕް ހިއްސާ ކުރިއިރު، އޭގައި ”ވެނެޒުއޭލާގެ އެކްޓިން ރައީސް“ އަކީ އޭނާ ކަމަށް ލިޔެފައި ވެއެވެ.
މީގެ އިތުރުން ޓްރަމްޕް ވަނީ ކިއުބާގެ ރައީސަކަށް މާކޯ ރޫބިއޯ އިންތިހާބު ކުރުމަށް ވެސް ތާއީދު ކޮށްފައެވެ.
ޖެނުއަރީ މަހުގެ ތިން ވަނަ ދުވަހު މަޑޫރޯ ހައްޔަރު ކުރުމަށް ފަހު ބޭއްވި ނޫސްވެރިންގެ ބައްދަލުވުމެއްގައި ޓްރަމްޕް ބުނީ ވެނެޒުއޭލާއަށް ތެލުގެ ކަންކަން ކުރިއަރަން ދެން އެމެރިކާ އިން އެ ގައުމު ހިންގާނެ ކަމަށެވެ. އަދި ވެނެޒުއޭލާގެ ”އިންޗާޖް“ އަކީ އެމެރިކާ ކަމަށް އޭނާ ބުންޏެވެ.
މަޑޫރޯ އާއި އޭނާގެ އަނބިކަނބަލުންގެ މައްޗަށް އެމެރިކާގެ ނިއުޔޯކްގެ ކޯޓެއްގައި މައްސަލަތަކެއް މިހާރު ދަނީ ހިނގަމުންނެވެ.